Qurban aıtqa oraı qasapshylarǵa semınar ótti (FOTO)
Qasıetti Qurban aıt meıramyna oraı «Halal Damýdyń» uıymdastyrýymen «Qasapshylyq – saýapty hám jaýapty is» taqyrybynda onlaın-semınar ótti.
«Halal Damý» dırektory Aıbek Asqarbekulynyń jetekshiligimen «Zoom» platformasynda ótken semınarǵa QMDB Sharıǵat jáne pátýa bóliminiń mamany Medet Qurmashuly, veterınarlyq sanıtarııa isiniń mamany Danııar Baqzeıneluly jáne jergilikti baqylaýshylar men tehnologtar, sonymen qatar óńirlik qasaphana qyzmetkerleri qatysty. Semınarda Qurban aıt kúnderi qurban shalý rásiminiń sharıǵat ádepterine saı oryndaýdyń mańyzdylyǵy men talaptary, basty qaǵıdalary men erejeleri túsindirildi.
«Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanulynyń tapsyrmasymen barlyq óńirde qurbandyq shalynatyn oryndardy ázirleý jáne qaýpisizdik-tazalyq sharalary, qasapshylar daıarlaý jáne olarǵa túsindirme semınar uıymdastyrý boıynsha arnaıy jumystar bekitilgen bolatyn. Sharıǵı normalardy saqtap, qurbandyq malyn soıý úlken jaýapkershilikti qajet etedi. Sondyqtan qurbandyq shalynatyn nysandarda qyzmet etetin qasapshylarǵa arnaıy semınar-trenıng uıymdastyrýdy jón kórdik», – dedi Aıbek Asqarbekuly.
Dáris barysynda qasapshylyq qylatyn azamattarǵa Medet Qurmashuly arnaıy dáris júrgizip, qurban shalýdyń sharıǵı úkimderi men talap-sharttaryn keńinen túsindirse, Danııar Baqzeıneluly halal standartqa saı mal baýyzdap, et óńdeý jóninde dáris oqydy.
Aıta keteıik, qazirgi tańda Respýblıka boıynsha «QMDB Halal» sertıfıkatyna ıe bolǵan 32 qasaphana men 690 qasapshy tirkelgen. Elimizdiń barlyq óńirindegi «Halal Damý» sertıfıkattaýynan ótken qasapshylar men qasaphanalar Qurban aıt meıramynda halyqqa óz qyzmetin usynýǵa tolyqtaı daıyn ekendigin habarlaımyz!
