Qyzmettik ádepti saqtaý qatań qadaǵalanady (FOTO)

QMDB Tóraǵasy, Bas múftı Naýryzbaı qajy Taǵanulynyń tóraǵalyǵymen orazanyń birinshi aptasyn qorytyndylaýǵa arnalǵan jıynda QMDB bólim basshylary Ramazannyń alǵashqy aptasynda atqarylǵan is-sharalardyń esebin tanystyrdy.

QMDB Dinı bilim jáne kadr daıarlaý bóliminiń meńgerýshisi Smaıyl Seıtbekov bólimge qatysty jáne Ádep keńesiniń jumysymen tanystyrdy.

«Dinı basqarma joǵary bilimdi jáne arnaýly dinı bilimdi maman daıarlap keledi. Osy oraıda bıyl Nur-Múbarak ýnıversıtetiniń ıslamtaný mamandyǵy boıynsha 230 túlek (onyń ishinde 171 er bala, 59 qyz bala), 9 medrese-kolledjin 437 túlek (onyń ishinde 308 er bala, 129 qyz) bitiredi.

Nur-Múbarak ýnıversıtetin jáne medrese kolledjderdi bitirýshi túlektermen onlaın kezdesý ótkizdik. Endigi kezekte ár ókildik Nur-Múbarak pen medrese-kolledj basshylyǵymen habarlasyp, túlektermen onlaın ári oflaın kezdesýler ótkizip, qyzmetke tartý sharasyn qolǵa alýy tıis» dedi Smaıyl Seıtbekov.

Sondaı-aq bólim basshysy Bas múftı bastamasymen bıyl qańtar aıynda Ádep keńesi qurylǵanyn aıta kelip: «Ádep keńesiniń maqsaty – ımamdardy jazalaý emes, Dinı basqarmanyń, meshit ımamdarynyń bedelin kóterý. Ramazan aıy bolǵandyqtan, ýaǵyz aıtý men tikeleı Efırge shyǵý kóbeıdi. Sol úshin oblystyń Bas ımamdarynan meshit qyzmetkerleriniń qyzmettik ádep erejelerin saqtaýyn qadaǵalaýdy suraımyn» dedi.

​