RAMAZAN-2026: ON KÚNDE 534 263 ADAMǴA AÝYZAShAR BERILDI
Bul týraly búgin Bas múftı Naýryzbaı qajy Taǵanulynyń tóraǵalyǵymen ótken Qazaqstan musylmandary dinı basqarmasynyń Tóralqa májilisinde Din men dástúr bóliminiń meńgerýshisi Nurbek Esmaǵanbet habarlady.
«Barlyq meshitter men dárethanalardyń tazalyǵy turaqty baqylaýǵa alynyp, dybys kúsheıtkishter men mıkrofondardyń jumysy tekserildi. Anyqtalǵan tehnıkalyq kemshilikter der kezinde túzetildi. Sonymen qatar Elektr jelileri, jylytý júıeleri men órt qaýipsizdigi quraldarynyń jaǵdaıy tekserilip, meshitterdiń qaýipsizdigin qamtamasyz etý sharalary júrgizildi.
Taraýyq namazynan keıin jamaǵattyń úılerine qaýipsiz jetýi úshin birqatar óńirlerde tegin qoǵamdyq kólikter uıymdastyryldy. Barlyq meshitterde quptan namazynan keıin 30 mınýt kútip, paryz jáne taraýyq namazdaryn birizdi tártippen oqý jolǵa qoıyldy.
Aýyzashar taǵamdarynyń halal standarttarǵa jáne sanıtarlyq talaptarǵa saı bolýy qatań baqylaýǵa alyndy. Taǵam ónimderinde «QMDB Halal» belgisiniń bolýy mindettelip, qaıyrymdylyqqa arnalǵan azyq-túlikterdiń quramyna da erekshe nazar aýdaryldy.
Qasıetti Ramazan aıy bastalǵaly beri elimizdegi meshitterde alǵashqy 10 kún ishinde 534 263 adamǵa aýyzashar berildi. Búginde Qazaqstan boıynsha 1258 meshitte kún saıyn tegin aýyzashar dastarhandary uıymdastyrylyp, muqtaj jandar qamtylýda»,- dedi Nurbek Áýeshanuly.
