RANT múshesi Islam ınstıtýtynda ýaǵyz-nasıhat aıtty

Astana qalasyndaǵy «Hýsamıddın as-Syǵanaqı» atyndaǵy ıslam ınstıtýtynda dinı oqý-aǵartý baǵyty aıasynda stýdenttermen kezdesý ótti.

Kezdesýge QMDB Dinı ońaltý bóliminiń mamany, respýblıkalyq aqparattyq-nasıhat tobynyń múshesi Qaıýpov Islam Maratuly qatysyp, «Hanafı mazhaby jáne Matýrıdı senimi» taqyrybynda ýaǵyz-nasıhat aıtty.

Júzdesý barysynda dástúrli ıslam qundylyqtary, mazhab ustanýdyń mańyzy jáne dinı senimniń durys negizderi keńinen túsindirildi. Sondaı-aq jastardyń dinı saýatyn arttyrý, kúmándi dinı kózqarastardan saqtaný jáne senim máselesinde durys baǵytty ustaný jaıy sóz boldy.

Budan bólek, qazirgi qoǵamda kezdesetin jat aǵymdardyń belgileri men olardyń zııanyna toqtalyp, odan saqtanýdyń joldary aıtyldy. Stýdentterge dinı bilimdi senimdi derekkózderden alyp, bilikti ustazdardan úırenýdiń mańyzy eskertildi.

Kezdesý sońynda qatysýshylar kókeıdegi suraqtaryn qoıyp, tıisti jaýap aldy.