Rátbek qajy Nysanbaıulyna «Parasat» ordeni berildi (FOTO)
QMDB-nyń tuńǵysh tóraǵasy, búginde Almaty oblysynyń Eńbekshiqazaq aýdany Esik qalalyq meshitiniń bas ımamy bolyp qyzmet atqaratyn Rátbek qajy Nysanbaıulyna Qazaqstan Respýblıkasy Prezıdentiniń Jarlyǵymen «Parasat» ordeni berildi. Osyǵan oraı Taldyqorǵanda arnaıy basqosý ótip, QMDB Tóraǵasy, Bas múftı Naýryzbaı qajy Taǵanuly men Almaty oblysynyń ákimi Amandyq Batalov marapatty ıesine tabystady.
Aldymen qonaqtarǵa jyly yqylasyn bildirgen oblys ákimi Amandyq Batalov: «Búgin biz jaqsy jańalyqpen bas qosyp otyrmyz. Prezıdentimiz Qasym-Jomart Kemeluly ardaqty aǵamyz Rátbek qajy Nysanbaıulyn dinı-rýhanı salaǵa sińirgen eńbegi úshin «Parasat» ordenimen marapattaý týraly sheshim qabyldap, osy nagradany keýdeńizge erekshe qurmetpen taǵý mindetin maǵan júktedi. 80 jyldyq mereıtoıyńyzdyń qarsańynda berilip otyrǵan osy laıyqty marapatyńyzben quttyqtaý saltanatyna Bas múftı Naýryzbaı qajy da arnaıy kelip otyr. Bul – bárimizdiń sizge degen qurmetimiz», – dep Rátbek qajynyń keýdesine «Parasat» ordenin taǵyp, óz atynan jazylǵan quttyqtaý hatyn usynyp, ıyǵyna shapan japty.
QMDB Tóraǵasy, Bas múftı Naýryzbaı qajy Taǵanuly sóz alyp, basqarmanyń atynan syı-sııapat kórsetti. Rátbek qajynyń Orta Azııa musylmandary dinı basqarmasy quramynan Qazaqstan musylmandary dinı basqarmasynyń jeke shyǵyp, shańyraq kóterýine tikeleı muryndyq bolǵan eńbegin atap ótti.
«90-jyldary qıyn kezeńde eldegi ımandylyqtyń bastaýynda ózińiz turdyńyz. Biz shákirt bop sizge ilestik. Ózińiz bastaǵan is aıaqsyz qalmady. Allaǵa shúkir, meshitterimizdiń sany artty. Elde ımandy qoǵam qalyptasty. Sizge uzaq ǵumyr, jaqsylyq tileımin!» – dedi Naýryzbaı qajy Taǵanuly.
Rátbek qajy Nysanbaıuly óz kezeginde eńbegin elegen Elbasyǵa, Prezıdentke, oblys basshylyǵyna rızashylyq bildirip, osy qýanyshqa oraı ystyq yqylas bildirgen barsha janǵa rahmet aıtty. Aqsaqal el men jer tarıhy, rýhanı qundylyqtar jaıynda áńgime qozǵap, osynyń bári keıingi urpaqqa baǵdar bolar jol bolýy tıis ekenin atap ótti.
Jıynǵa sondaı-aq Almaty oblystyq ardagerler keńesiniń tóraǵasy Ermek Kelemeıit, QMDB Apparat basshysy Ǵylymbek Jádigeruly, Sharıǵat jáne pátýa bóliminiń meńgerýshisi Sansyzbaı Qurbanuly qatysty.
