Senat tóraǵasy barsha musylman qaýymyn quttyqtady

Senat Tóraǵasy Máýlen Áshimbaev elimizdiń barsha musylman qaýymyn qasıetti Ramazan aıynyń bastalýymen quttyqtady.

«Bul – sabyrlyqtyń, meıirimniń jáne izgiliktiń aıy. Osy kezeńde adamzatty yrys-yntymaqqa shaqyratyn rýhanı qundylyqtar keńinen dáripteledi. Otyz kún orazada qaıyrymdylyq tanytyp, muqtaj jandarǵa qoldaý kórsetý de ıgi dástúrge aınaldy.

Ókinishke qaraı, bıyl da Ramazan aıy búkil álemdi jaılaǵan pandemııa kezeńine tuspa-tus kelip otyr. Sondyqtan azamattarymyz qalyptasqan keıbir rásimderdi oryndaýda Qazaqstan musylmandary dinı basqarmasynyń usynymdaryna qulaq asqany jón. Bul rette halqymyz jaýapkershilik tanytady dep senemiz» dedi Máýlen Áshimbaev.

Sondaı-aq Senat Tóraǵasy «Nıet etken jandarǵa ustaǵan orazalaryńyz ben tilegen duǵa-tilekterińiz qabyl bolsyn deımin. Bereke-birligimiz arta bersin. Ár shańyraq shattyqqa kenelsin. Elimiz aman, jurtymyz tynysh bolsyn!» degen ıgi tilegin de jetkizdi.