Serikbaı qajy Oraz Aqtóbeniń bir top meshit jamaǵatymen suhbattasty (FOTO)

Qazaqstan musylmandary dinı basqarmasynyń tóraǵasy Serikbaı qajy Oraz Aqtóbe oblysynan kelgen birtop meshit jamaǵatymen júzdesti.

Kezdesýge QMDB tóraǵasynyń Birinshi orynbasary Naýryzbaı qajy Taǵanuly, múftııat qyzmetkerleri qatysty.

Erkin basqosýda Bas múftı bir mázhabty ustanýdyń hıkmeti, qazirgi musylman jamaǵatynyń birligi, otbasy qundylyǵy, dinı alaýyzdyqtyń zardaby, dinı senim týraly zańnyń talaptary men mindetteri, múftııattyń dinı ustanymy men joly týraly áńgimelep berdi.

«Biz keshe ǵana musylman bolǵan el emespiz. Ultpen qatar ómir súrip kele jatqan dinimiz, ómirsheń dilimiz, tamyry tereń tarıhymyz bar. Bizdiń maqsatymyz – Islam órkenıetiniń damýyna qyzmet etý, eldiń ıgiligi úshin eńbek etetin qabiletti, baısaldy, dinı aǵymǵa aldanyp ketpeıtin, din men dástúrdi úılestirip, ónegeli ómir saltyn jańǵyrtatyn zııaly ortany qalyptastyrý. Biz «áhli súnna ýal jamaǵat», ıaǵnı paıǵambarymyzdyń jáne sahabalardyń (kópshiliktiń) jolyn ustanýshy úmbetpiz. Alla Elshisi kópshilikpen birge bolýdy ósıet etken», – dep atap ótti Serikbaı qajy Satybaldyuly.

Kezdesý barysynda jınalǵan jamaǵat kókeıde júrgen saýaldaryn qoıyp, óz oılarymen bólisti.

Basqosý sońynda Bas múftı QMDB-nyń «Otbasym» serııasymen shyqqan birneshe kitapty syıǵa berdi.

​