Serikbaı qajy Oraz Oralda jańa meshittiń ashylýyna qatysty (FOTO)

Qazaqstan musylmandary dinı basqarmasynyń tóraǵasy Serikbaı qajy Oraz Batys Qazaqstan oblysyna jasaǵan sapary barysynda Oral qalasynyń irgesindegi Serebrıakova kentinde salynǵan 200 adamdyq Aıtý ata meshitiniń ashylýyna qatysty. Alla úıiniń ashylý saltanatynda Bas múftı jańa meshitke óziniń arnaıy syılyǵyn tabys etti.

Ashylý saltanatynda sóz alǵan Serikbaı qajy Satybaldyuly:

"Bul ómirge kelgen árbir pende óziniń artynan óshpes mura nemese óshpes iz qaldyryp ketsem dep armandaıdy. Oǵan jeter jol Islam sharıǵatynda jatyr. Alla úıin salǵan adamdarǵa qatysty Paıǵambarymyz (oǵan Allanyń salaýaty men sálemi bolsyn) óz hadısinde bylaı deıdi: «Kim jer betinde Allanyń úıin salýǵa atsalyssa, Alla Taǵala ol kisige jumaqtan oryn daıyndaıdy». Islam tarıhynda meshit salý – barsha paıǵambarlar shuǵyldanǵan qadirli is bolǵan. Óıtkeni, meshit – musylman balasynyń qajetti duǵa-tilekterin bir Alla Taǵaladan ǵana suraıtyn, pendelik qatelikteri úshin keshirim surap, táýbege keler mekeni", - dedi.

Merekeli sharada elimizge belgili jyrshy-termeshi Jáken Omarov taǵylymdy tolǵaýlardan shashý shashty. 

​