ShARAPATY MOL ShAǴBAN AIY MÚBÁRAK BOLSYN!

Qadirli jamaǵat!

Barshańyzdy sharapaty mol Shaǵban aıynyń kelýimen shyn júrekten quttyqtaımyn!

Qasıetti Ramazan aıynyń kelgenin súıinshileıtin Shaǵbanda ár shańyraqqa shattyq, baqyt pen bereke tileımin. Alla Taǵala osy aıda jasaıtyn duǵa-tilekterimizdi, qulshylyq-ǵıbadattarymyzdy qabyl etkeı!

Ardaqty Paıǵambarymyz Muhammed (oǵan Allanyń salaýaty men sálemi bolsyn) óz úmbetine Shaǵban aıy kirgende tazalanyp, nıetimizdi durystaýdy ósıet etken.

Alla elshisiniń taǵy bir hadıs-sharıfinde aıtylǵandaı, Shaǵban aıynda jasalǵan duǵa keri qaıtarylmaıdy. Endeshe, sharapaty mol Shaǵban aıynda shynaıy nıetpen halqymyzdyń amandyǵyn surap, kóp duǵa jasaıyq.

Qurmetti jamaǵat!

Izgi ǵulamalardyń biri «Erejep – jelge, Shaǵban – bultqa, Ramazan jańbyrǵa uqsaıdy. Erejep aıynda dán egilmese, Shaǵbanda sýarylmasa, Ramazanda qandaı egin kútýge bolady» degen.

Osy aıda nıetimizdi túzep, nápil oraza ustap, múmkindiginshe tazalanyp, duǵa jasap ózimizdi qorǵaıyq. Quran oqyp, qınalǵan jandarǵa, naýqastarǵa, qıyndyqqa tap bolǵan musylmandarǵa Alladan jeńildik, shıpa tileıik. Óıtkeni, «Quran oqý – kóńildiń shıpasy» (hadıs).

Alla Taǵala elimizge amandyq, jerimizge tynyshtyq, halqymyzǵa bereke násip etkeı! El irgesin berik etip, Shaǵbannyń sharapatyna bólenýdi jazǵaı!

Rabbym, Erejepti aman-esen aıaqtadyq, endi Shaǵban aıyn da berekeli ete gór! Bizdi Ramazanǵa aman-esen jetkize gór! Ámın!

Naýryzbaı qajy TAǴANULY
Qazaqstan musylmandary dinı basqarmasynyń tóraǵasy, Bas múftı