«Shashý» otbasylyq ansambli «Áziret Sultan» meshitin zııarat etti (FOTO)

Búgin Nur-Sultan qalasyndaǵy respýblıkalyq «Áziret Sultan» meshitine Jetesovter otbasynan quralǵan «Shashý» ansambli arnaıy kelip, zııarat jasady. Jóni bólek qurmetti qonaqtardy meshit bas ımamy Erbolat Júsipov ózi qarsy alyp, qulshylyq ordasymen tanystyrdy.

Aıta keteıik, Aqtóbe qalasynda turatyn Jetesov Ómirhan aǵamyzdyń bul kúnde baýyryna basqan 21 balasy bar. Jastaıynan jetimdiktiń zardabyn tartyp ósken Ómirhan jubaıy Almagúl Eshpanovamen aqyldasa kelip, sońǵy on jyl ishinde balalar úıinen 18 búldirshindi óz qamqorlyqtaryna alǵan. Balalarǵa meıirim shýaǵyn tógip, jastaıynan eńbek pen ónerge qatar baýlyǵan ata-ananyń úmiti aqtalyp, perzentteriniń barlyǵy bul kúnde bir-bir aspaptyń qulaǵynda oınaıtyn ónerpaz bolyp ósipti. Sazsyrnaı, qobyz, shańqobyz, dombyra, baıan, jetigen, sherter, shińkildek syndy ulttyq aspaptarymyzǵa jan bitirip, búginde otbasylyq ansambl bolyp qalyptasqan.Osy joly el astanasyna arnaıy gastroldik saparmen kelip, kontsert berip kele jatqany beti eken.

Erlikke bergisiz amal jasap qana qoımaı, balalarynyń boıyna izgilik pen eńbeksúıgishtiktiń, ózine degen senimdiliktiń, bastysy júrekterinde ómir oty tutatqan Jetesovter otbasyna Bas ımam shynaıy alǵysyn bildirip, rızashylyǵyn jetkizdi. Baldyrǵandar arnaıy duǵa jasap, aq tilegin bildirdi.

Elge júrer aldynda qulshylyq ordasy arnaıylap kelgen Jetesovter otbasy Bas meshittegi «Imanı jaz» jazǵy saýat ashý kýrsynyń aıaqtalý rásimine dóp kelip, bala shákirtterge óz ónerlerin pash etti.

Sýretterdi «FOTOGALEREIa» aıdarynan kóre alasyzdar!