Taldyqorǵan óńirine jańa bas ımam taǵaıyndaldy (FOTO)
QMDB Tóraǵasy, Bas múftı Naýryzbaı qajy Taǵanulynyń buıryǵymen Taldyqorǵan óńiriniń bas ımamy bolyp Almas Danaǵulov taǵaıyndaldy. Ol – buǵan deıin Almaty oblystyq «Iman» meshitiniń naıb ımamy jáne Taldyqorǵan qalalyq «Nur» meshitiniń bas ımamy qyzmetin qatar atqarǵan tájirıbeli din qyzmetkeri.
Jańadan taǵaıyndalǵan bas ımamdy Taldyqorǵan jamaǵatyna QMDB Din isteri jáne taldaý bóliminiń meńgerýshisi Nurbek Esmaǵanbet tanystyrdy.
Budan keıin Almaty oblysynyń ákimi Amandyq Batalov Qazaqstan musylmandary dinı basqarmasynyń ókilderin qabyldady. Kezdesýde Nurbek Áýeshanuly Almaty oblysy ákimdiginiń din isterine degen janashyrlyǵyn rızashylyqpen jetkize kele:
«Qaıyrymdylyq is-sharalary boıynsha Almaty oblysy aldyńǵy qatarda. Máselen «El úlesi – páterge» jobasynyń aıasynda respýblıka boıynsha muqtajdarǵa barlyǵy 438 baspana alyp berilse, sonyń 78-i osy Almaty oblysynda júzege asyryldy. Bul – elimiz boıynsha eń úlken kórsetkish. Aımaqtaǵy bas ımamdarymyz ben din qyzmetkerleriniń ózderińizben birlesip atqarǵan eleýli jumystary áli de jemisin beredi dep senemin. Ardaq Orazbaevtyń basqa qyzmetke aýysýyna baılanysty Bas múftı buıryǵymen ózderińizge etene tanys din qyzmetkeri Almas Danaǵulov Taldyqorǵan óńiriniń jáne ortalyq «Iman» meshitiniń bas ımamy qyzmetine taǵaıyndaldy», – dedi.
Qonaqtardy jyly qabyldaǵan oblys ákimi Amandyq Batalov kúni keshe ǵana musylmandardyń qasıetti merekesi Qurban aıtty joǵary deńgeıde ótkizgenderin atap ótti.
«Almaty oblysy – óte úlken aımaq. Eki mıllıonnan astam turǵyny bar. Biz úshin eń basty baılyq – halyqtyń birligi, tynyshtyǵy. Biz búginge deıin QMDB-nyń Taldyqorǵan óńirindegi bas ımamy Ardaq Orazbaevpen birlesip kóp jumys atqardyq. Qanshama ıgi isterge uıytqy boldyq. Mundaı jumystardy biz aldaǵy ýaqytta da jalǵastyramyz», – dedi oblys ákimi A.Batalov.
Sondaı-aq aımaq basshysy Taldyqorǵan óńiriniń bas ımamy qyzmetin abyroımen atqarǵan Ardaq Núsiphanulyna rızashylyǵyn bildire kele, aldaǵy qyzmetine sáttilik tilep, «Qurmet» gramotasyn tabystady. Al bes jylǵa jýyq óńirdiń bas ımamy qyzmetin atqarǵan Ardaq Núsiphanuly oblys ákimi men óńir halqyna aıryqsha alǵysyn bildirip, Almas Danaǵulovqa sáttilik tiledi.
Qazirgi tańda Almaty oblysynda 476 meshit jumys istese, 578 ımam din jolynda qyzmet etip keledi.
