Tatarstannyń «Halal» komıtetimen memorandým jasaldy (FOTO)
Tatarstan musylmandary dinı basqarmasy «Halal» standarttaý komıtetiniń tóraǵasy Abbıas Shlıaposhnıkov pen Qazaqstan musylmandary dinı basqarmasyna qarasty «Halal Damý» standarttaý jáne sertıfıkattaý mekemesiniń dırektory Aıbek Asqarbekuly ózara dostyq jáne yntymaqtastyq jóninde memorandýmǵa qol qoıdy.
Qazan qalasyndaǵy HII halyqaralyq «Reseı – Islam álemi: KazanSummit» Ekonomıkalyq sammıtine Bas múftı Naýryzbaı qajy Taǵanulynyń tapsyrmasymen QMDB delegatsııasy da qatysyp jatqanyn aıtqan bolatynbyz. «Biter istiń basyna – jaqsy keler qasyna» demekshi, sammıt aıasynda eki eldiń Dinı basqarmalaryna qarasty standarttaý jáne sertıfıkattaý uıymdary birlese jumys isteýge bekinip otyr.
«Halal» komıtet pen «Halal Damý» arasyndaǵy memorandým eki mekemeniń halal sertıfıkatyn ózara moıyndaýǵa, sertıfıkattalǵan ónimderdi el arasynda eshqandaı kedergisiz erkin Eksporttaýǵa, birlesken jobalardy júzege asyryp, bilim-ǵylym, tájirıbemen almasýǵa, halal máseleleri boıynsha túrli is-sharalar men oqý-semınarlaryn ótkizýge, sondaı-aq taraptardy óńirlik jáne halyqaralyq deńgeıde ózara ilgeriletýge múmkindik beredi.
Keden odaǵyna múshe elder arasyndaǵy taýar aınalymnyń 30%-ǵa jýyǵyn halal taǵam ónimderi qurasa, onyń bir bóligi Tatarstannan tasymaldanýda. Otandyq «QMDB HALAL» tańbasymen shyǵarylatyn ónimder de Reseı Federatsııasyna, Tatarstanǵa Eksporttalady. Sondyqtan eki sertıfıkattaý mekemesi arasyndaǵy memorandým tabysty da jemisti nátıjeler kórsetetine senemin» degen Aıbek Asqarbekuly bul kelisim eki eldiń birligi men baýyrlastyǵyn nyǵaıtýǵa yqpal etetinin málimdedi.
Al «Halal» standarttaý komıtetiniń tóraǵasy Abbıas Fatıhovıch dinı saladaǵy kórsetken qoldaýy úshin alǵysyn bildirip, bul tarıhı qujat eki memlekettiń rýhanı jáne mádenı baılanystaryna oń yqpal etetinin aıtty.
