«Táýelsiz Qazaqstan jáne Islam qundylyqtary» halyqaralyq konferentsııasy ótedi
25 qarasha kúni Nur-Sultan qalasynda Qazaqstan musylmandary dinı basqarmasynyń uıymdastyrýymen el egemendiginiń 30 jyldyq mereıtoıyna oraı «Táýelsiz Qazaqstan jáne Islam qundylyqtary» taqyrybynda halyqaralyq-ǵylymı tájirıbelik konferentsııa ótedi.
Konferentsııada Qazaqstannyń táýelsizdik jyldarynda rýhanı salada jetken jetistikteri, Qazaqstannyń Tuńǵysh Prezıdenti – Elbasy Nursultan Nazarbaevtyń Islam dininiń damýyna qosqan úlesi men dinaralyq kelisimdi nyǵaıtýdaǵy eńbegi, Memleket basshysy Qasym-Jomart Toqaevtyń rýhanı saladaǵy bastamalary, sonymen qatar Qazaqstan musylmandary dinı basqarmasynyń qoǵamdaǵy róli men orny jaıly taqyryptar qamtylyp, musylman memleketteriniń din qaıratkerleri men elimizdiń zııaly qaýym ókilderi baıandama jasaıdy.
Halyqaralyq konferentsııaǵa Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly, Túrkııa Respýblıkasy Din isteri basqarmasynyń tóraǵasy Alı Erbash, Reseı Federatsııasy musylmandary dinı basqarmasynyń jáne múftıler keńesiniń tóraǵasy Ravıl Gaınýtdın, Ózbekstan musylmandary dinı basqarmasynyń tóraǵasy Nýrıddın Holıknazarov, Qyrǵyzstan musylmandary dinı basqarmasynyń tóraǵasy Zamır Rakıev, Tájikstan Islam ortalyǵy Ǵulamalar keńesiniń tóraǵasy Saıdmýkarram Abdýkodırzoda, Mońǵolııa musylman uıymdary odaǵynyń tóraǵasy Batyrbek Hadys, Reseı Federatsııasy Altaı Respýblıkasy musylmandary dinı basqarmasynyń bas múftıi, Reseı Azııa bóligi musylmandary dinı basqarmasynyń tóraǵasy Janbolat Ohtaýbaev, Reseı Federatsııasy Omby jáne Omby oblysy musylmandary dinı basqarmasynyń tóraǵasy Bota Bakýlın qatysady.
Halyqaralyq konferentsııaǵa sondaı-aq memleket jáne qoǵam qaıratkerleri, zııaly qaýym ókilderi, tarıhshy ǵalymdar, sheteldiń elimizdegi ókiletti elshileri, óńirlerdegi bas ımamdar qatysady.
