Táýelsizdik kúni Qostanaıda meshit ashyldy

Qostanaı aýdanyna qarasty Altynsarın aýylynyń turǵyndary elimizdegi uly mereke – Táýelsizdik kúni úlken qýanyshqa bólendi. Eldimekende jańa meshit boı kóterip, paıdalanýǵa berildi.

Aıtýly sharaǵa Qostanaı oblysynyń bas ımamy Bahytbek Tájimbet, óńirdiń bedeldi azamattary, aýyl turǵyndary, din qaıratkerleri qatysty. Aldymen Quran aıattary oqylyp, elimizdiń egemendigi úshin ǵasyrlar boıy kúresip, táýelsizdik jolynda qurban bolǵan ata-babalarymyzdyń rýhyna saýaby baǵyshtaldy. 

Jınalǵan halyqtyń aldynda Bahytbek Nurǵabyluly sóz sóılep, barsha qaýymdy ǵıbadat ornynyń aıtýly merekede esigin aıqara ashýymen shyn júrekten quttyqtady. Atalǵan aýylda mundaı jurtshylyqty ımandylyqqa uıytatyn parasat ordasy aýadaı qajet-ti. Sony jete túsingen ardaqty aqsaqal Ertarǵyn Jubanyshev pen rýhanııat salasynyń bilikti mamany Medet Baızaqov jaqsy iske uıytqy boldy. Olardy usynysyn aýdannyń bas ımamy Darqan Manarbekuly der kezinde qýattady. Sóıtip, oblys ımamy Bahytbek Nurǵabyluly izgi maqsattaǵy bastamalaryn qoldady.

Bul meshittiń qurylysy erte kóktemde bastalyp, nebary jarty jyldyń ishinde tolyq aıaqtaldy. «Kóp túkirse, kól bolar» demekshi, qajetti qarajat máselesine janashyr kásipkerler men jergilikti halyq tikeleı atsalysty. 

«Paıdalanýǵa berilgen meshit ǵımaraty shamamen 200 adamǵa laıyqtalǵan. Onyń bir jaǵy namazhana bolsa, ekinshi jaǵynda ashana ornalasqan. Syrtqy kelbeti men ishki kórinisi kimniń bolsyn nazaryn eriksiz aýdartady. Al, jıhazben qamtamasyz etýge oblystyń bas ımamy kómek qolyn sozdy. Qazir meshittiń bólmeleri qys merzimine tolyq daıyn, ári jyly. Kógildir gaz tartylǵan» deıdi «Mańdaı batyr» meshitiniń ımamy Darqan Syzdyqov.

Halyqtyń ıgiligine berilgen meshittiń moldasy qyzmetin jerlesteri arasynda syı-qurmetke bólengen Ertarǵyn Bımaǵambetuly atqarady. 

Derekkóz: akmechet.kz

Источник: Aidos