TÓRT BAǴYTQA JAÝAPTY MAMANDARDYŃ JOSPARY NAQTYLANDY

Búgingi elorda ımamdarynyń alqaly jıynynyń aıasynda Astana ókildigindegi tórt baǵytqa jaýapty mamandar jyl sońyna deıingi jumys josparyn aıqyndady. Eń aldymen Bas ımam Allanyń úıi bolǵan meshitterde ıgi iske ortaqtasý úlken jaýapkershilik ári saýapty amal ekenin jetkizdi.

«Islamnyń bes tireginiń biri bolǵan kúndelikti bes ýaqyt namaz oqylatyn osyndaı záýlim meshitte bas qosýymyz – Allanyń bizderge bergen jaqsylyǵy ári úlken múmkindigi. Allanyń dinine qyzmet etip júrgen áriptesterdiń udaıy máseleler qozǵalǵan jıyndarda basqosýy aradaǵy baýyrmashyldyqty kúsheıtip, aýyzbirshilikti arttyrady dep senemin. Sebebi ıgi isterdiń aınalasynda júrgen jandar yntymaqtassa jáne aýyzbirshiligi myqty jáne oıymyzyben sózimiz bir bolsa, aspaıtyn asý, almaıtyn qamal bolmaıdy.

Jyl basynda Bas múftı Naýryzbaı qajy Taǵanuly haziret Qazaqstan musylmandary dinı basqarmasynyń 2026 jyly basymdyq beretin tórt baǵytyn «Baǵdarlyq baıandamasynda» atap, naqty tapsyrmalar bergen bolatyn. Sonymen qatar tórt baǵyt pen Aıtýly is-sharalardyń 2026 jylǵy jumys jospary bekitilgen edi.

Búgingi jıynnyń kún tártibinde qaralatyn negizgi máseleler de jospar tóńireginde bolmaq. Atap aıtqanda Dinı basqarma bekitken jospar boıynsha Astana qalasy ókildigi aldaǵy aılarda atqaratyn sharalardyń josparyn naqtylap alýy qajet» - dedi Nurbek qajy Áýeshanuly.

Jıynda tórt baǵyt boıynsha onyń ishinde «Ihsan jáne nasıhat» baǵyty boıynsha is-sharalarynyń josparly jumystaryn tanystyrǵan Hamıt Myrzageldıev naqty is-sharalar, dárister, aıtylýy tıis taqyryptarǵa toqtaldy. Al «Dinı oqý-aǵartý» baǵyty boıynsha is-sharalardyń josparly jumystaryn jetkizgen naıb ımam Mahmud Qasym elorda meshitterinde ótýi tıis basty jumystardy atap ótti. Onyń ishinde «Úzdik ımam» jobasy syndy aıtýly sharalar bar. Sonymen qatar «Dástúr jáne otbasy» baǵyty boıynsha sóz alǵan Abdýlahad Smanov ulttyq qundylyqtardy arttyrý, din men dástúrge baǵyttalǵan dúnıelerge toqtaldy. Al «jat dinı aǵymdardan saqtandyrý» baǵyty boıynsha aldaǵy aılarda atqarylatyn is-sharalardy tanystyrǵan Raqymǵazy Qabdysalym destrýktıvti aǵymnan saqtaný, meshitterde osy jaıynda kezdesý ári dáristerdi júıeli uıymdastyrý jáne áleýmettik jelilerge arnalǵan shaǵyn suhbattar serııasyn jasaý kerektigin jetkizdi.

Qazaqstan musylmandary dinı basqarmasyna qarasty «Zeket jáne qaıyrymdylyq» qory jyl saıyn tamyz aıynda «Mektepke jol» aktsııasyn uıymdastyryp keledi. Atalǵan is-shara bıyl da jalǵasady dep josparlanýda. Aktsııany ótkizý barysy jaıly ókildiktiń jaýapty mamany Nurbol Orazbaı tolyq baıandady.

Sonymen qatar jıynda Ádep keńesin qurý týraly bastama kóterilip, Bas ımam Áziret Sultan meshitiniń Is basqarýshysy Jandilla Bekjigitovke keńestiń quramyn bekitý týraly usynys berý qajettigin aıtty. Odan bólek elorda ımamdarynyń áleýmettik jelidegi belsendiligi, qandaı taqyrypta ýaǵyz aıtý qajettigi pysyqtaldy.

Kezdesý sońynda Bas ımam barsha din qyzmetkerlerine jumysty jandandyrý boıynsha birqatar tapsyrma berdi.