Túrkııadaǵy Qazaq qaýymdastyǵymen kezdesý ótti (FOTO)

Túrkııaǵa resmı saparmen kelgen QMDB delegatsııasy Stambuldaǵy «Qazaq qaýymdastyǵymen» kezdesý ótkizdi.

Qoja Ahmet Iasaýı qarılar ortalyǵy janyndaǵy Parasat qorynyń basshysy Ilııas Saka qonaqtardy qabyldap, Quran úıretetin ortalyqtyń jumysymen tanystyryp ótti.

Keıin naıb múftı Sansyzbaı Qurbanuly bastaǵan delegatsııa Stambulda turatyn qandastarmen arnaıy kezdesip, el táýelsizdiginiń 30 jyldyǵymen quttyqtady.

«Bıyl el Táýelsizdiginiń 30 jyldyǵy. 16 jeltoqsan Qazaqstanda Táýelsizdik kúni retinde atap ótiledi. Sizderdi egemendiktiń 30 jyldyǵymen quttyqtaımyn. 1990 jyly sol kezdegi Orta Azııa musylmandary dinı basqarmasynan bólinip, derbes múftılik retinde Qazaqstan musylmandary Dinı basqarmasy quryldy. Byltyr ǵana biz Dinı basqarmanyń 30 jyldyǵyn atap óttik. Táýelsizdik alǵan tusta elimizde nebary 68 ǵana meshit bolsa, qazir onyń sany 2700-ge taıady. Tarydaı shashylǵan qazaqtyń Túrkııaǵa kelip qonystanǵanyna 70 jyl tolypty. Osy aralyqta atalarymyz til men dildi, dástúrdi umytpaı keleshek urpaqqa jetkizdi. Endi qazirgi jastar, sizder sol amanatty arqalaýǵa tıissizder. Alla sizderge jar bolǵaı!» – dedi naıb múftı, Sharıǵat jáne pátýa bóliminiń meńgerýshisi Sansyzbaı Qurbanuly.

Sondaı-aq QMDB Apparat basshysy Ǵylymbek Jádigeruly Bas múftıdiń sálemin jetkizip, qonaqjaılyq tanytqan osy eldegi qandastardy táýelsizdiktiń mereıli merekesimen quttyqtady.

Jıynda Stambuldaǵy Bas konsýl Álim Baıel sóz alyp, ortalyqta qazaq balalarynyń bilim alýyna jaǵdaı jasap otyrǵan jergilikti qazaqtarǵa alǵysyn jetkizdi. Kezdesý sońynda naıb múftı elden ala kelgen arnaıy dámdi shákirtterge berip, Stambuldaǵy qazaq qarııalaryna qurmet retinde taqııa kıgizdi.

Aıta keteıik, atalǵan Quran jattaý ortalyǵy irgetasyn 1991 jyly qalaǵan.