«ÝAQYP» QORY 234 377 OTBASYǴA QAIYRYMDYLYQ JASADY
Qazaqstan musylmandary dinı basqarmasy janynan qurylǵan «Ýaqyp» qaıyrymdylyq qory 234 377 otbasyǵa qaıyrymdylyq kómek kórsetti. Bul týraly «Ýaqyp» qorynyń basqarma tóraǵasy Ardaq Orazbaev aıtty.
Elordada ótken keńeıtilgen Ortalyq apparat jınalysynda Ardaq Núsiphanuly «Ýaqyp jáne qaıyrymdylyq» baǵytynda qańtar-tamyz aılarynyń esebin Bas múftı Naýryzbaı qajy Taǵanulyna baıandady.
«Ýaqyp» qorynyń jumysyn jetildirý maqsatynda elimizdiń ár aımaǵynda semınar-trenıngter uıymdastyrylýda. Bıyl waqf.kz saıty ashylyp, áleýmettik jelilerde de júıeli túrde nasıhattalyp keledi. Sonyń nátıjesinde jamaǵat arasynda úıin, saıajaıyn, tipti ata-anasynyń atynan qudyq qazyp ýaqyp etip jatqandar kezdesedi.
Jýyrda ǵana «Ýaqyp» qorynyń uıymdastyrýymen Nur-Sultan qalasynda «Hýsamýddın ás-Syǵanaqı atyndaǵy ıslam ınstıtýty» jeke mekemesi ashyldy. Sondaı-aq elimizde QMDB-ǵa qarasty 30-ǵa jýyq qaıyrymdylyq mekemesi bar. Bul mekemelerde 32 ustaz qyzmet etse, 813 bala quran jattap, dáris alýda. Al «RUHANYAT» saýda oryndarynyń jobasy nátıjesinde oblystardaǵy meshitter janynan 4 dúkender jelisi ashylǵaly jatyr. Bul saýda oryndarynan túsken árbir paıda Alla jolynda qaıyrymdylyqqa jumsalady jáne oǵan kez kelgen adam úlesin qosa alady, ıaǵnı ýaqyp jasaı alady» dedi qordyń basqarma tóraǵasy.
Sondaı-aq Ardaq Núsiphanuly «Zeket jáne qaıyrymdylyq» qory men «Qamqor-Sharapat» salttyq qyzmet ortalyǵynyń jumys esebin de baıandap ótti.
«Bıyl «Zeket jáne qaıyrymdylyq» qory «El úlesi – páterge» jobasy aıasynda 83 muqtaj otbasynyń baspanaly bolýyna sebepker bolsa, «Ýaqyp» qorymen birlesip Ramazan aıynda 912 197 adamǵa aýyzashar berdi. «QMDB granty» aıasynda «Nur-Múbarak» ýnıversıtetinde bilim alyp jatqan 59 stýdenttiń oqý aqysy tólendi. Elimiz boıynsha 382 956 qaıyrymdylyq is-sharasy uıymdastyrylyp, 1 345 829 adamǵa kómek berildi.
«Qamqor Sharapat» salttyq qyzmet ortalyǵyna qarasty 28 máıithana jumys istep tur. Máıitterdi jýyndyratyn 185 qyzmetshiler (er,áıel) jasaqtaldy. Qabir qazatyn 49 brıgada, meshitterge tıesili 9 máıit tasymaldaıtyn arnaıy katafalka kólikteri men 3 127 tabyt bar. Óńirlerdegi zırattardyń ishinen arnaıy jer-sektorlar bólinýde. Ortalyqqa bólingen oryndarǵa «Zırat jáne zııarat» kontseptýaldy qujaty negizinde 436 máıit jerlendi» dedi ol.
