«Ýaqyp» qorynyń onlaın semınary ótti (FOTO
2022 jylǵa arnalǵan keńeıtilgen Tóralqa májilisinde Bas múftı Naýryzbaı qajy Taǵanuly QMDB bıyl jeti baǵytqa, sonyń ishinde «Ýaqyp jáne qaıyrymdylyq» baǵytyna basymdyq beretinin atap ótken bolatyn. Osy oraıda «Ýaqyp» qorynyń basqarma tóraǵasy Ardaq Núsiphanulynyń jetekshiligimen respýblıkalyq onlaın semınar ótti.
Semınarǵa elimizdiń barlyq aýdandary men qalalaryndaǵy «Ýaqyp» qorynyń ókilderi qatysty. Jıynda qordyń jobalary talqylanyp, óńirlerdegi ókilderge naqty tapsyrmalar berildi. Atap aıtqanda, kásipkerlermen birikken qaıyrymdylyq jasaýǵa arnalǵan joba týraly túsindirme jumystary júrgizildi. Osyǵan sáıkes «Ýaqyp» ókilderi kásipkerlermen kelissózder júrgizip, «Ýaqyp» qorymen birlesken qaıyrymdylyq qyzmet týraly memorandým ornatýy qajet.
Sondaı-aq «Ýaqyp» ókilderine meshitterdiń janynan «Ýaqyp» qorynyń «RUHANYAT» atty dúkenin ashyp, kásipkerlermen kelissóz júrgizý júkteldi. Joba aıasynda ókilderge ýaqyp jasaýdy nasıhattaý maqsatynda meshit aýlasynan dúken ashqysy kelgen kásipkerlermen seriktesken túrde jumys atqarý týraly nusqaýlar berildi. Sonymen qatar «Ýaqyp» qoryna qarasty «QAMQOR-SHARAPAT» ortalyǵynyń maqsaty, qundylyqtary, josparlary túsindirildi. El aýmaǵynda jerleý rásimderindegi ysyrapty joıý jaıy sóz etildi. Sondaı-aq jerleý rásimi men ýaqyp sadaqasyn baılanystyra otyryp jumys atqarýdyń úlgileri berildi.
Jıyn sońynda «QAMQOR-SHARAPAT» ortalyǵynyń dırektory Meırambek Qabylbekuly semınarǵa qatysýshylarǵa alǵysyn aıta kele, Bas múftı Naýryzbaı qajy Taǵanulynyń atalǵan ortalyqtyń jumysyn respýblıka boıynsha jandandyrý týraly tapsyrmasy negizinde ókildikterge naqty tapsyrmalar berilgenin alǵa tartty. Ortalyqtyń jumysy óńirlerde keńinen nasıhattalyp jatqanyn, nátıjesinde elimiz boıynsha meshit qyzmetkerlerinen ortalyqtyń mamandary iriktelip, ár óńirden janaza jáne jerleý rásimin atqaratyn mamandar jasaqtalǵanyn atap ótti. Sonymen qatar zırattar ishinen jerler rásimdeý, qalalyq, aýdandaǵy ortalyq meshitter janynan máıithanalar ashý jumystary qarqyndy júrip jatqanyn atap ótti.
Aıta keteıik, ýaqyp – sarqylmaıtyn saýap, ıaǵnı adam qaıtys bolsa da artynan toqtamaı saýap baryp turatyn amal. Ýaqyp qylýdyń birneshe joly bar: meshit, medrese salý, Quran syılaý, oqý aqysyn tóleý, turǵyn úımen qamtý, kópir salý, qudyq qazý, baý-baqsha egý t.b.
