ULTTYQ MEREKEMIZ – RESPÝBLIKA KÚNI QUTTY BOLSYN

Qurmetti qaýym! Qadirli baýyrlar!

Sizderdi elimizdiń ulttyq merekesi – Respýblıka kúnimen shyn júrekten quttyqtaımyn! Alla Taǵala elimizge amandyq, jurtymyzǵa tynyshtyq násip etsin! Jaratýshy Iemiz baıtaq Otanymyz táýelsiz Qazaqstannyń halqyna baq-bereke bergeı!

25 qazan – Respýblıka kúni araǵa 13 jyl salyp, ulttyq mereke retinde qaıta oraldy. Prezıdentimiz Qasym-Jomart Toqaev Ulytaýda ótken Ulttyq quryltaıda: «Ulttyq merekeler men ataýly kúnder tizbesine birqatar ózgeris engizgen jón. Men Respýblıka kúnine ulttyq mereke mártebesin qaıtarýdy usynamyn. Sondyqtan, qazannyń jıyrma besi kúni jyl saıyn Egemendik kúnin elimizdiń basty merekesi retinde atap ótýimiz kerek», – degen bolatyn. 29 qyrkúıek kúni Memleket basshysy tıisti zańǵa qol qoıyp, Respýblıka kúnin ulttyq merekeler qataryna qosty.

Biz úshin Táýelsizdigimizdiń altyn tuǵyry sanalatyn, eldigimizdiń bastaýy sanalatyn Respýblıka kúniniń mańyzy zor. Sebebi 1990 jyldyń 25 qazanynda Qazaq KSR Joǵarǵy Keńesiniń sheshimimen «Qazaq KSR-niń memlekettik egemendigi týraly» deklaratsııa qabyldanǵan bolatyn. Osy kúnnen bastap bolashaq táýelsiz eldiń irgetasy qalanyp, eldiń memleket qurý jolyndaǵy tarıhı qadamy jasaldy. Qazaqstan derbes memleket retinde ornyǵa bastady. Sondyqtan bul kúnge erekshe qurmetpen qarap, erkindiktiń, egemendiktiń bastaýy retinde asa mán berýge tıispiz.

Respýblıka kúni – elimizdiń ıgiligi, baǵa jetpes qundylyq. Sol sebepti bul kúnniń mán-mańyzyn jas urpaqqa kóbirek dáriptep, ulttyq rýhty asqaqtatatyn, aıbynymyzdy asyratyn is-sharalar uıymdastyryp, joǵary deńgeıde atap ótýimiz shart. Sebebi dana halqymyz aıtqandaı, «Otan otbasynan bastalady». Alla Taǵala Otanymyzdy shyn súıip, elimizge adal qyzmet etýdi násip etsin! 

Alla Taǵala elimizdiń egemendigin baıandy etip, halqymyzǵa amandyq, jerimizge tynyshtyq bergeı! Ámın!

Naýryzbaı qajy TAǴANULY,
QMDB Tóraǵasy, Bas múftı