JANAZA JÁNE JERLEÝ RÁSIMDERINE QATYSTY SEMINAR ÓTTI (FOTO)
Astana qalasyndaǵy «AQMESHIT» meshitinde jamaǵatqa arnalǵan janaza jáne jerleý rásimderine qatysty semınar ótti.
Qazaq halqy ǵasyrlar boıy kúndelikti ómir tirshiliginde, sonyń ishinde adamnyń dúnıege kelýi men qaıtys bolýyna qatysty rýhanı-dinı rásimderdi oryndaýda musylmanǵa tán mádenıetti ustanyp keledi. Alaıda sońǵy ýaqyttaǵy dinı rásimderdiń sharıǵat normalaryna sáıkes kelmeıtin ózgeristerge ushyraı bastaǵany baıqalady. Mysaly, qabir basyna qulpytas retinde orasan úlken eskertkishter men záýlim qorshaýlar ornatý t.b.
Bul áreketter qoǵamnyń ártúrli ókilderi, onyń ishinde aqsaqaldar men din mamandary tarapynan jıi-jıi synǵa ushyraýda. Qala berdi Qazaqstan musylmandary dinı basqarmasyna shaǵym túsýde. Budan bólek, qabirler men kesenelerdi zııarat jasaýshylar dinı talaptarǵa jatpaıtyn áreketterge boı aldyrýda.
Dinı basqarma osy atalmysh rásimderdiń sharıǵatqa saı oryndalýyn tártipke keltirip, zırat turǵyzý men zııarat jasaýdyń, kesene salýdyń jalpyǵa ortaq, birińǵaı mádenıetin qalyptastyrýǵa tyrysyp keledi. Bul halyqqa túsindirý jumystaryn ótkiziý arqyly júzege asatyny belgili. Osy maqsatta ótkizilgen búgingi semınarǵa QMDB Astana qalasynyń ókil ımamy Erbolat Nuryldauly, «QAMQOR-SHARAPAT» salttyq qyzmet kórsetý ortalyǵynyń dırektory Meırambek Qabylbekuly, Astana mańyndaǵy Qyzylsýat meshitiniń bas ımamy Saıat Hasenov jáne «AQMESHIT» meshitiniń bas ımamy Dáýren Mýslımov qatysyp, búgingi sharanyń mańyzdylyǵy men mańyzdy eskertpelerdi atap ótti. Máselen, janazadan keıingi as berý mádenıeti bizde durys qalyptaspaǵanyn aıtyp, ysyrapshylyqqa jol bermeýge shaqyrdy. Sondaı-aq, QMDB-nyń 2020 jyly ımamdardyń respýblıkalyq IV forýmynda qabyldaǵan «Zırat jáne zııarat mádenıeti», «As berý mádenıeti» atty qujattaryn jamaǵatqa tanystyrdy.
Jıynda «AQMESHIT» meshitindegi «QAMQOR-SHARAPAT» ortalyǵy qyzmetkeri Gýmar Jýmagýlov máıitti jýý men ony qalaı kebindeý kerektigin kórsetip, jamaǵatqa birneshe sharıǵı máselelerdi eskertti.
Источник: Aidos
