Jastar forýmynyń úndeýi qabyldandy (FOTO)
«Islam – yntymaq pen birlik dini» jyly aıasynda ótkizilgen «Jalyndy jastar yntymaǵy» respýblıkalyq jastar forýmynyń qorytyndysy boıynsha arnaıy úndeý qabyldandy. Úndeýdi QMDB Jastar isi sektorynyń meńgerýshisi Ádilet Kópen oqyp berdi.
«Biz, «Jalyndy jastar yntymaǵy» respýblıkalyq jastar forýmyna qatysýshylar, Qazaqstan musylmandary dinı basqarmasynyń 2022 jyldy «Islam – yntymaq pen birlik dini» jyly dep jarııalaǵan bastamasyn qoldaımyz jáne jas býyn ókilderin tolyqqandy, sapaly, básekege qabiletti bilim alyp, el ıgiligi úshin qyzmet etýge, sonymen qatar destrýktıvti dinı aǵymdardyń ıdeologııasynan saqtanýǵa shaqyramyz.
Azamattardyń, ásirese jastardyń áleýmettik-qoǵamdyq ómirge belsendi aralasýy, sondaı-aq olardyń ortaq maqsatqa jetý jolynda kúsh biriktirýi – órkendeý men ózgeristerdiń mańyzdy faktory dep bilemiz. Biz, forým delegattary, jastardy qoǵamda dástúrli qundylyqtardy nasıhattaýǵa, dinimiz ben saltymyz tyıym salǵan jaman ádetterden, hákim Abaı aıtqan bes nársege asyq, bes nárseden qashyq bolýǵa úndeımiz. Óıtkeni ósek-ótirik aıtý, maqtanshaq, erinshek bolý, beker mal shashý – adam balasyn azdyratyn jaman ádetter.
Qoryta aıtqanda, kez-kelgen memlekettiń jarqyn bolashaǵy men kemeldenýi jastardyń bolmysy men sanasyna, mádenı damýyna, bilim deńgeıi men tájirıbesine tikeleı baılanysty. Sondyqtan qazirgi tańda jastardyń rýhanı-tanymdyq tárbıesin, jan-jaqty saýattylyǵyn arttyrýdyń mańyzy úlken. Zamanǵa saı bilim alýdy, dástúrli qundylyqtardy saqtaýdy jadymyzdan shyǵarmaıyq» delingen úndeýde.
Aıta keteıik, jastar forýmynda QMDB Tóraǵasy, Bas múftı Naýryzbaı qajy Taǵanuly, Aqparat jáne qoǵamdyq damý mınıstrligi Jastar jáne otbasy isteri komıtetiniń tóraǵasy Shahmardan Baımanov, «AMANAT» partııasy janyndaǵy Jastar qanatynyń jetekshisi Nurjan Jetpisbaev, «Qazaqstan team» jastar uıymynyń basshysy Oljas Súleımenov, abaıtanýshy, «4 Damý» jobasynyń avtory Ernat Melsuly t.b belsendi jastar baıandama jasady.
