«Jibek Joly» qaıyrymdylyq mekemelerimen ózara árekettesý týraly ekijaqty Kelisimniń toqtatylýyna baılanysty QMDB MÁLIMDEMESI
«Jibek Joly» qaıyrymdylyq mekemeleri qaýymdastyǵymen 2021 jyldyń 26 qazanynda jasalǵan ekijaqty Kelisimniń 2023 jyldyń 26 qańtarynda toqtatylýynyń naqty sebepteri men negizdemelerine qatysty qoǵamda týyndaǵan suraqtarǵa baılanysty Qazaqstan musylmandary dinı basqarmasy málimdeıdi:
QMDB Qazaqstanda dinı turaqtylyq pen qoǵamdyq kelisimdi saqtaý jáne nyǵaıtý maqsatynda Islam dininiń dástúrli rýhanı qundylyqtaryn qoǵamda nasıhattap, aǵartý qyzmetin atqaryp kele jatqan respýblıkalyq dinı birlestik. Óz qyzmetin QMDB din salasyndaǵy qazaqstandyq zańnamaǵa saı atqarady.
Joǵarydaǵy Kelisim, 2019 jyldyń 19 shildesindegi «Jibek Joly» qaýymdystyǵynyń bastamasymen jasalǵan, alaıda, zańǵa qaıshy bolýyna baılanysty 2020 jyldyń qarashasynda QMDB tarapynan toqtatylǵan Memorandýmnyń ornyna jasalǵan.
Atalmysh Kelisimniń 2019 jyly bolǵan Memorandýmnan aıyrmashylyǵy men ereksheligin ashyp aıtsaq, taraptar qandaı da bir dinı-mıssıonerlik amaldardy «Jibek Joly» qaýymdystyǵynyń qaıyrymdylyq mekemelerinde júrgizbeý týraly mindettemeni ózderine júktep alǵan bolatyn.
Iaǵnı, QMDB men «Jibek Joly» qaýymdastyǵymen bolǵan atalmysh ekijaqty Kelisimge saı qaýymdastyq tárbıelenýshileri QMDB meshitteri janyndaǵy dinı saýat ashý kýrstarynda bizdiń ımamdardan dástúrli ıslamdyq dinı ilimdi úırenýi kerek edi.
Qaıyrymdylyq mekemelerdiń tárbıelenýshilerine yńǵaıly bolý úshin óńirlerdegi bul mekemelerge jaqyn ornalasqan meshitterdiń dinı saýat ashý kýrstaryna qatysýǵa QMDB tarapynan barynsha múmkindik jasaldy.
Alaıda, «Jibek Joly» qaýymdastyǵy tarapynan atalmysh Kelisimniń negizgi talaptaryn oryndamaý birneshe ret qaıtalandy. Atap aıtsaq, osy qaýymdastyqqa qarasty qaıyrymdylyq mekemelerdiń ǵımarattarynda tárbıelenýshilerge dinı sabaqtardy kedergisiz júrgizýge qol jetkizý maqsatynda ımamdarmen ózara kelisýge jáne munyń zańǵa qaıshy emestigin negizdep berýge áreketter jasalǵan.
Kelisim aıasynda qoıylǵan zańdy talaptardy oryndamaı, memleketimizdiń zańdaryn qurmettemegeni úshin «Jibek Joly» qaýymdastyǵynyń qyzmetine qatysty senimsizdik týyndady.
«Jibek Joly» qaýymdastyǵyna degen senimsizdik jaqynda BAQ-ta taralǵan jańalyqtardan keıin órshı tústi. Qaýymdastyqqa qarasty qaıyrymdylyq mekemelerdegi zańsyzdyqtar polıtsııa tarapynan anyqtalyp, dinı alaýyzdyqqa qatysty tergeý amaldary júrgizilýde.
Budan bólek, aqparattyq alańda «Jibek Joly» qaýymdastyǵynyń «medrese» shákirtterine degen syltaýmen sadaqa jınaýmen aınalysqany týraly málimetter tarady. Bul is-áreketterge QMDB-nyń qatysy bar degen qate oı-pikirler qoǵamǵa taralýda.
Osy rette, bul qaýymdastyqtyń «medrese» dep qate atalatyn qaıyrymdylyq mekemeleri nemese pansıonattary Astana, Almaty, Shymkent, Aqtóbe, Oral, Pavlodar, Taraz qalalarynda, Almaty oblysynyń Úshqońyr aýylynda jáne Túrkistan oblysynyń Saryaǵash kentinde qyzmet jasaıtyn QMDB-ǵa qarasty 9 resmı medrese-kolledjderge qatysy joq dep málimdeımiz.
QMDB Qazaqstan azamattaryn, sonyń ishinde kámeletke tolmaǵan jasóspirimderdi májbúrli túrde dinge tartýǵa nemese olardyń rýhanı damýyna kedergi keltirýge eshkimniń quqyǵy joq ekenin málimdeıdi. «Jibek Joly» qaýymdastyǵyna qarasty qaıyrymdylyq mekemeleriniń tárbıelenýshileri ózge de Qazaqstan azamattary sekildi qandaı da bir shekteýsiz óz erikterimen QMDB meshitteri janyndaǵy dinı saýat ashý kýrstaryna qatysa alady.
Qazaqstan musylmandary dinı basqarmasy
