«Jomart juma» aktsııasyn qoldaǵan dámhanaǵa sertıfıkat berildi (FOTO)
Sońǵy ýaqyttary el ishinde «Black friday» (Qara juma) aktsııasy degen uǵymnyń synamalap kirip kele jatqany jasyryn emes. Dinimizge de, dástúrimizge jat osy ataýdyń óńin ózgertý maqsatynda QMDB «Jomart juma» aktsııasyn usynǵan bolatyn.
QMDB usynysyna alǵashqylardyń biri bolyp elordadaǵy «Altaı» jeke kásipkerligine qarasty «DAPANRU» dámhanasy qoldaý bildirip, dámhananyń barlyq ónimine ár juma saıyn 50% jeńildik jasady. Sondaı-aq dámhana basshylary bul aktsııanyń jyl boıy jalǵasatynyn habarlady.
Jaqsylyqqa qol ushyn sozǵan «DAPANRU» halal dámhanasynyń bul bastamasyna Dinı basqarma basshylyǵy qoldaý bildirip, «Halal Damý» mekemesiniń «QMDB halal» sertıfıkatyn tabystaýdy jón kórdi.
«Halal Damý» tehnolog mamandary dámhana aımaǵynda baqylaý-qadaǵalaý sharalaryn júrgizip, qajetti azyq-túlikter men shıkizattardy tolyqtaı tekserdi. Zerthanalyq tekserý nátıjesinde dámhana ónimderi men qyzmeti «QMDB halal» sertıfıkatyna laıyq dep tanyldy.
Osyǵan oraı búgin «DAPANRU» halal dámhanasyna «QMDB halal» sertıfıkatyn Bas múftıdiń keńesshisi Baltabaı Ýájıtuly tabystady.
«Juma – aptanyń sultany, kúnderdiń tóresi. Juma – musylmandar úshin qasıetti kún. Adamnyń eń jaqsysy – basqalarǵa paıdaly bolǵany. Al amaldar ishindegi Allaǵa súıiktisi – adamdardyń júregine qýanysh syılaý. Dámhana ujymy «Jomart juma» bastamasyn qoldaý arqyly qanshama adamdardyń júregine qýanysh syılady. Alla Taǵala Qurannyń «ár-Rahman» súresinde: «Jaqsylyqtyń jaqsylyqtan basqa qaıtarymy bar ma?» degen. Biz de sizdiń jaqsylyǵyńyzdy jaqsylyqpen qaıtarýdy jón dep sanadyq», – dedi Baltabaı Ýájıtuly.
Aıta keteıik, «DAPANRU» dámhanasy «Tamaqtandyrý qyzmetteri» jáne «Halal ónimderdi óndirý, óńdeý, daıyndaý, saqtaý, tasymaldaý jáne satýǵa qoıylatyn jalpy standart» talaptary boıynsha «QMDB halal» sertıfıkatyn aldy.
