Jyldyq esep-2021: 127 383 suraqqa jaýap berildi
QMDB Sharıǵat jáne pátýa bóliminiń mamandary jyl basynan beri elimiz boıynsha 127 383 suraqqa jaýap berdi.
Pátýa mamandary jeke kezdesýde, telefon arqyly Call-ortalyqqa habarlasýshylarǵa jáne áleýmettik jeli qoldanýshylarynyń saýaldaryna jaýap berip keledi. Máselen, bıyl 28 345 suraqqa jeke kezdesýde jaýap berilse, Dinı aqparat berý ortalyǵynyń 8 71 72 33 30 30 nómirine habarlasýshylar 33 032, al áleýmettik jeli qoldanýshylarynyń 66 006 suraǵyna jaýap berilgen.
Saýaldardyń 45%-y ǵıbadat, 11%-y otbasy, 7%-y múliktik qatynas, 7%-y aqıda, qalǵan 30%-y ártúrli taqyryptarǵa qatysty qoıylǵan. Dinı suraq-jaýap retinde ázirlengen maqalalar fatua.kz (108 maqala) pen muftyat.kz (54 maqala) saıttaryna jáne respýblıkalyq «Munara» gazetine (55 maqala) jarııalandy.
Sondaı-aq sharıǵat jáne pátýa mamandaryna otbasy quqyǵyna qatysty 313 ótinish kelip tússe, onyń 277-si tıisti sheshimin taýyp, qalǵan 36-y áli de qaralý ústinde. Saraptamaǵa 107 kitap kelip tússe, onyń 100-ine oń, qalǵan 7-ýine teris qorytyndy berildi.
