Jyldyq esep-2021: bir jylda 445 kásiporyn sertıfıkattaldy
QMDB «Halal damý» standarttaý jáne sertıfıkattaý ortalyǵy mamandary jyl basynan beri 445 kásiporyndy jańadan sertıfıkattaýdan ótkizip, 100 qasapshyǵa arnaıy kýálik berdi. Búginde 1000-nan astam kásiporyn, 630 qasapshy «QMDB HALAL» sertıfıkatymen ónim óndirýde.
Elimizdegi eń iri saýda oryndarynyń biri sanalatyn 165 «MAGNUM» dúkenniń et jáne shujyq sórelerine «QMDB HALAL» belgisi berildi. Sondaı-aq Reseı Ózbekstan, Qyrǵyzstan, Mońǵolııa, Túrkimenstanda ornalasqan sheteldik kásiporyndardan da kelip túsken ótinishter qanaǵattandyrylyp, sertıfıkat tabystaldy. Jyl boıy 2574 ret tekseris jumysy júrgizildi.
Bıyl «Halal Damý» mamandary 2 halyqaralyq, 4 otandyq konferentsııaǵa qatysty. Bas múftı bastamasymen sapaly maman daıarlaý maqsatynda «Halal Damý» mekemesi janynan ashylǵan oqý ortalyǵynda 50-ge jýyq semınar-trenıng ótkizilip, oǵan 800-ge jýyq tehnolog, Ekspedıtor, veterınar, azyq-túlik qaýipsizdigi mamandary qatysty.
2021 jyldyń 27 mamyrynda Almatyda Bas múftı Naýryzbaı qajy Taǵanulynyń qatysýymen halal ónimderdiń alǵashqy eń aýqymdy jármeńkesi ótti. 11-12 qazan kúnderi Shymkent qalasynda «QMDB HALAL» sertıfıkatyn alǵan ónimderdiń halyqaralyq «HALAL EXPO-2021» kórmesi ótti. Kórmege Ózbekstan, Qyrǵyzstan, Reseı elderiniń jáne otandyq kásipkerler men ınvestorlar, halal ındýstrııasyndaǵy beldi kásiporyndar men halyqaralyq sertıfıkattaý organdary qatysty.
