Jyldyq esep-2021: «Muftiyat» baspasy bıyl 28 kitap shyǵardy (FOTO)
Dinı basqarmaǵa qarasty «MUFTIYAT» baspasy 2021 jyly 110 100 tırajben 28 kitap shyǵardy. Bul týraly elordada ótken QMDB Tóralqa májilisinde «MUFTIYAT» baspasynyń dırektory Murat Manapuly baıandady.
«QMDB Tóraǵasynyń jetekshiligimen «MUFTIYAT» baspasynan «Tápsirlerdiń tańdaýlysy» tórt tomdyǵy, «Izbrannyı ız tafsırov» tórt tomdyǵy, «Ihsan – rýhanı tárbıe negizi», «Ihsan – osnova dýhovnogo vospıtanııa», «Pátýalar jınaǵy. Úshinshi kitap», «Tolyq adam (Ǵylymı-teologııalyq taldaý)» syndy 28 kitap jaryqqa shyqty. Atalmysh kitaptardyń tanytymyna qatysqan zııaly qaýym ókilderi bul týyndylarǵa ózderiniń jyly lebizderin bildirip, jamaǵat ta oń baǵasyn berdi.
30 myń danamen taralatyn Dinı basqarmanyń «Munara» rýhanı-tanymdyq gazetiniń 54 sany oqyrmanǵa jol tartty. Gazette el Táýelsizdiginiń 30 jyldyǵyna oraı avtorlar men oqyrmandar arasynda «Erkindigim. Qasıettim. Qasterlim» atty shyǵarmashylyq baıqaýy jarııalanyp, Táýelsizdik kúni qarsańynda birinshi oryn alǵan shyǵarma avtoryna Umra qajylyǵyna joldama berildi. BAQ qyzmetkerleri merekesi qarsańynda gazettiń bas redaktory Serikbol Hasan Prezıdent grantymen, fototilshi Qaısar Turlybekov Prezıdent Alǵys hatymen, betteýshi Eldar Qaba Aqparat jáne qoǵamdyq baılanys mınıstriniń Qurmet gramotasymen marapattaldy», – dedi Murat Manapuly.
Sonymen qatar Bas múftı Naýryzbaı qajy Taǵanulynyń bastamasymen 2021 jyl Ihsan jyly dep jarııalanǵan bolatyn. Ihsan ilimine qatysty saıt-portaldarda, respýblıkalyq, oblystyq, aýdandyq gazetterde 1 938 maqala jarııalanyp, áleýmettik jelilerde 4 582 jazba-ınfografıka taratyldy. Bir jyl ishinde ıhsan ilimin nasıhattaıtyn 3 345 ýaǵyz-dáris halyqqa usynylsa, onlaın jáne oflaın formatta 1 645 is-shara (dóńgelek ústel, semınar, kezdesýler) ótti. Odan bólek QMDB-ǵa qarasty din qyzmetkerleri men ókildikteri Ihsan ilimine qatysty 27 kitap jáne kitapsha shyǵardy.
