JYLDYQ ESEP-2024: MÚFTIIaT JAŃA MOBILDI QOSYMShALARDY ISKE QOSTY
2024 jyly QMDB Tsıfrlyq damý bólimi Múftııat júıesin tsıfrlandyrý baǵytynda birqatar mańyzdy jobalardy júzege asyrdy.
Bólim meńgerýshisi Tımýr Orynhannyń aıtýynsha, Ramazan aıy qarsańynda muftyat.kz saıtyna Qazaqstan boıynsha 6 myńǵa jýyq eldi mekenniń koordınattary engizilip, «2024 jylǵa arnalǵan Ramazan kestesin júkteý» qyzmeti iske qosyldy. Nátıjesinde, bir aıdyń ishinde 2,7 mıllıon ret oraza kestesi júkteldi.
«Bas múftı Naýryzbaı qajy Taǵanulynyń bastamasymen 2020 jyly iske asqan QURBAN2020 jobasy búginde qurban2024.kz ataýymen jańa formatta jumys isteı bastady. Bul saıtqa zamanaýı dızaın, avtomattandyrylǵan tólem júıesi, jappaı SMS taratý jáne jetekshi banktermen ıntegratsııa qosyldy.
MUFTYAT APP mobıldi qosymshasy iske qosylyp, qoldanýshylarǵa dinı basqarma jańalyqtary, pátýalar, maqalalar, suraq-jaýaptar, kitaptar, dárister men ýaǵyzdardy usynatyn platformaǵa aınaldy. Bul qosymsha aldaǵy ýaqytta jańa fýnktsııalarmen jetildiriledi.
Al qajylyq maýsymynda iske qosylǵan Qajy Guide qosymshasy qajylar men umra ótýshilerge arnalǵan tegin tsıfrlyq kómekshi boldy. Qosymshada vırtýaldy týr, qajylyq pen umrany óteý tártipteri, duǵalar, kitaptar, karta, habarlamalar jáne týroperatorlar tizimi sekildi aqparattar qamtyldy» deıdi bólim meńgerýshisi.
Sondaı-aq Tsıfrlyq damý bóliminiń uıytqy bolýymen 2024 jyly dinı baǵyttaǵy suraqtarǵa jaýap beretin fatua.kz saıty jańartylyp, zamanaýı ınterfeıspen qaıta iske qosyldy.
