Azan aıtylǵan kezde tyńdaýshy ne isteý kerek?

Assalamý aleıkým! Azan aıtylǵan kezde tyńdaýshy ne isteý kerek? Darhan Oralhanov

Ответ

Ýa aleıkým assalam!
Azan tek azanshylarmen shekteletin qulshylyq emes. Sondyqtan da azandy estigen árbir adamǵa qatysty bes súnnet amal bar. Olar: 

1. Azanshynyń sońynan ilesip, azan sózderin qaıtalaý.
Ábý Saǵıd ál-Hýdrı (r.a.): «Eger azan únin estiseńder, azanshy aıtqan sózderdi qaıtalańdar[1]», – degen rıýaıat jetkizgen.

Tek «Haıa alás-solá jáne haıa alál fáláh» (maǵynasy: Namazǵa asyq, máńgilik baqytqa asyq) sózderinen keıin «Lá háýlá ýá lá qýýátá ıllá bılláh», – dep aıtýy qajet. Muǵaýııa bın Ábý Sýfııan (r.a.) «Haıa alás-solá» sózin estigen kezde «Lá háýlá ýá lá qýýátá ıllá bılláh» dep, muny Paıǵambarlaryńnan (s.ǵ.s.) estidim[2]», – degen eken;

2. Azannan keıin Paıǵambarymyzǵa (s.ǵ.s.) salaýat aıtý.
Abdýlla bın Amr (r.a.): «Sosyn maǵan salaýat aıtyńdar. Óıtkeni, maǵan salaýat aıtqan adamǵa Alla on salaýat beredi[3]», – degen hadısti baıandaıdy.

3. Paıǵambarymyzǵa (s.ǵ.s.) eń joǵarǵy dárejeni suraý.
Hadıste: «Sosyn men úshin eń joǵary dárejeni surańdar. Ol –jánnattaǵy meken. Ol tek Alla quldarynyń birine beriletin. Sol pende menmin dep úmit etemin. Kimde-kim maǵan eń joǵary dárejeni surasa, oǵan shapaǵat beriledi...[4]», – dep aıtylǵan.

4. Taýhıd kálımasyn aıtý.
Saǵd bın Ábý Ýáqqas (r.a.): «Kimde-kim azan estigen kezde: «Áshhádý állá ıláhá ıllá Allahý, ýahdahý lá shárıká láh. Ýá ánná Muhámmád abdýhý ýá rasýlýh» (Alla Taǵalany Rabbym dep, Muhammedti Elshi dep, Islamdy din dep razymyn) dese, onyń kúnási keshiriledi», – degen hadısti rıýaıat etedi.

5. Azannan soń duǵa-tilek jasaý.
Abdýlla bın Amrdan (r.a.) rıýaıat: «Bir kisi kelip: Ýa, Alla elshisi! Azanshylar bizden artyq bolýda, – deıdi. Sonda Alla Elshisi (s.ǵ.s.): «Olar aıtqan sózdi qaıtala, bitken soń sura (duǵa jasa), tilegeniń beriledi[5]», – degen.

[1] Buharı, Mýslım
[2] Buharı
[3] Mýslım
[4] Mýslım
[5] Ábý Daýd, Nasaı