Quran tyńdaýshyǵa qandaı saýap bar?
Assalaýmaǵaleıkým!
Ázirge, Qurandy oqı almaımyn. Oqı alatyndaı úırenýimdi násip etýin tileımin. Biraq tyńdap júremin. Mysaly, «Qurandy oqysań, ár áripke 10 saýap jazylady», degen bar. Al, Qurandy tyńdaýǵa qatysty qandaı pikirler aıtylǵan? Sayat Sartbaev
Ответ
Ýa aleıkým assalam!
Qurannyń myń san qasıeti bar. Qurandy oqýshy da, ony tyńdaýshy da ózine tıesili jan azyǵyn alary sózsiz. Tipti, dáretpen Quran kitabyn qolǵa alyp paraqtap zer salýdyń ózi saýapty is.
Ábý Hýraıra (r.a.) rıýaıat etken hadıste: «Kimde-kim Alla Taǵala kitabynan bir aıatty tyńdaıtyn bolsa, oǵan eselep saýap jazylady. Al, kimde-kim Alla kitabynan bir aıatty tıláýat etetin bolsa, oǵan (sol aıat) qııamet kúni bir nur boldy[1]»,-degende Quran Kárimge qulaq salyp, tyńdaý saýapty amal.
Qadirli Paıǵambarymyz (s.ǵ.s.) ózi de arnaıy Quran oqytyp, jan-tánimen tyńdaıtyn bolǵan. Bul týraly Abdýlla bın Masǵud (r.a.): «Maǵan Alla elshisi (s.ǵ.s.): «Maǵan Quran oqyp ber»,-dedi. Men: «Ýa, rasýl Alla! Sizge oqyp bereıin be, (Quran) sizge túsirildi emes pe?,-dedim. Paıǵambar (s.ǵ.s.): «Aqıqatynda, men basqa bireýden tyńdaǵandy jaqsy kóremin»,-dedi. Men ol kisige Nısa súresin oqyp: «Biz árbir úmbetten bir kýá keltirgenimizde jáne seni osylardyń ústinen kýá etip keltirgenimizde jaǵdaılary qalaı bolar eken?[2]»,-degen jerge kelgenimde: «Jetkilikti, toqta»,-dedi. Ol kisige burylyp qaraǵanymda eki janarynan jas tógilip jatyr eken[3]»,-deıdi.
Demek, Qurandy tilmen tıláýat etken sııaqty, oǵan qulaq qoıyp tyńdaý da, zer salyp qaraý da saýapty amal.
