Paıǵambarymyz (s.ǵ.s.) qansha ret ýmra jasaǵan?

Assalamý aleıkým! Kelip jetken Máýlit aıy barshamyzǵa múbárak bolsyn! Sizderge qoıar suraǵym, Muhammed (s.ǵ.s.) pıaǵambarymyz ómirinde qansha ret ýmra qajylyǵyn ótegen? Máýlit aıynda Paıǵambarymyz (s.ǵ.s.) jaıly aqparattardy kóptep bilsek, barshamyzǵa qaıyrly bolar edi.

Ответ

Ýa aleıkým assalam! Suraǵyńyz óte oryndy. Eki dúnıe sardarynyń (s.ǵ.s.) ǵıbratty ǵumyry jaıly kóbirek bilýge talaptanǵanyńyz quptarlyq is. Máýlit aıy barshamyzǵa múbárak bolsyn!

Muhammed paıǵambarymyz (s.ǵ.s) ómirinde 4 márte ýmra jasaǵan. Imam Býharı jáne Mýslımniń rıýaıatynda Qatada: «Maǵan Ánástiń (r.a) aıtýy boıynsha paıǵambarymyz (s.ǵ.s.) 4 márte ýmra jasady barlyǵy da zýlqaǵda aıynda edi, tek qajylyqpen birge jasaǵany tysynda», – deıdi[1]

Paıǵambarymyz (s.ǵ.s.) jasaǵan kishi qajylyq saparlaryn tómendegideı tizbekteýge bolady:

Birinshisi: Hıjrettiń 6-shy jyly Hýdaıbııa degen jerge kelgende, mýshrıkter kedergi bolyp, Mekkege kirgizbeı sol jerde qurbandyqtaryn shalyp, shashyn aldyryp, keri qaıtqan.

Ekinshisi: Qaza ýmrasy, Hıjrettiń 7-shi jyly ýmra jasap, Mekke qalasynda úsh kún bolyp oralǵan.

Úshinshisi: Hıjrettiń 8-shi jyly Hýnáın ǵazaýatynan keri qaıtqan ýaqytynda, áýeli Mekkege baryp ýmra jasaǵan. Sodan keıin Mádınaǵa oralǵan.

Tórtinshisi: Hıjrettiń 10-shy jyly qajylyqpen biriktirip jasaǵan ýmrasy.

Áıgili ǵulama ımam án-Náýáýı Alla Elshisiniń (s.ǵ.s.) zýlqaǵda aıynda ýmra jasaýynyń sebebin bylaısha túsindiredi. «Islamnan buryn jáhılıet dáýirinde arabtar «zýlqaǵda aıynda ýmra jasaý – isterdiń eń jamany» dep tyıym salatyn edi. Olardyń bul sózderiniń jalǵan ári ol aıda jasalǵan ýmranyń ábestigi joq ekenin kórsetý maqsatynda jasady», – deıdi.[2]

Ǵazız Ahmet.
«Áziret Sultan» meshitiniń naıb ımamy