Qadir túnindegi kúnálar da eselenip jazyla ma?

Assalam aleıkým. Qadir túni ıgilik jasaǵan adamnyń saýaby kóp eselenedi deıdi. Sol úshin de bárimiz ıgi amaldarǵa umtylyp jatamyz. Alaıda bul túnde jamandyq jasap qoıǵan adamnyń jaıy ne bolmaq? Onyń jamandyqtary da solaı eselene me?

Ответ

Ýa aleıkým assalam. Iıa, Qadir túni jasalǵan jaqsylyqtardyń saýaby kóptep eselenedi. Sebebi, Alla Taǵala Qadir túnin erekshelep, «myń aıdan qaıyrly»[1] degen. Tápsirshiler bul aıatty Qadir túni jasalǵan ıgilik myń túnde jasalǵan ıgilikten qaıyrly dep túsindirgen. Bul – Alla Taǵalanyń quldaryna tanytqan meıirimi.

Al, endi negizgi suraqqa kelsek, buǵan qatysty Alla Taǵala qasıetti Quranda:

مَن جَاءَ بِالْحَسَنَةِ فَلَهُ عَشْرُ أَمْثَالِهَا ۖ وَمَن جَاءَ بِالسَّيِّئَةِ فَلَا يُجْزَىٰ إِلَّا مِثْلَهَا وَهُمْ لَا يُظْلَمُونَ

«Kim bir jaqsylyq keltirse, oǵan sondaı on ese bar. Jáne bireý bir jamandyq istese, sondaı-aq qana jaza beriledi de olar zulymdyqqa ushyratylmaıdy»,[2] – deıdi. Al, Paıǵambarymyz (s.ǵ.s) osy aıatty tolyqtap:

إِنَّ الله كَتَبَ الْحَسَنَاتِ وَالسَّيِّئَاتِ، ثُمَّ بَيَّنَ ذَلِكَ، فَمَنْ هَمَّ بِحَسَنَةٍ فَلَمْ يَعْمَلْهَا كَتَبَهَا الله عِنْدَهُ حَسَنَةً كَامِلَةً وَإِنْ هَمَّ بِهَا فَعَمِلَهَا كَتَبَهَا الله عَزَّ وَجَلَّ عِنْدَهُ عَشْرَ حَسَنَاتٍ إِلَى سَبْعِمِائَةِ ضِعْفٍ إِلَى أَضْعَافٍ كَثِيرَةٍ. وَإِنْ هَمَّ بِسَيِّئَةٍ فَلَمْ يَعْمَلْهَا كَتَبَهَا الله عِنْدَهُ حَسَنَةً كَامِلَةً، وَإِنْ هَمَّ بِهَا فَعَمِلَهَا، كَتَبَهَا الله سَيِّئَةً وَاحِدَةً

 «Rasynda, Alla jaqsylyq pen jamandyqty jazdy da ony bylaı baıandady: kimde-kim jaqsylyq jasaýdy nıet etip, biraq ony (qandaı da bir sebepterge baılanysty) jasamasa, Alla ony tolyq jaqsylyq retinde qabyldaıdy. Eger nıet etip ári ony jasasa, Alla ony onnan jeti júzge sheıin, tipti odan da kóp ese etip qabyldaıdy. Eger jamandyqty nıet etip, ony jasamasa, Alla ony tolyq jaqsylyq retinde qabyldaıdy. Eger sol jamandyqty nıet etse, ári ony jasasa, Alla ony bir ǵana jamandyq retinde qabyldaıdy»[3], – degen.

Toqeteri: kimde-kim Qadir túnin shynaıy ımanmen ári saýaptan úmit etip, ıgi ister jasaýmen ótkizse, ol óte kóp saýapqa keneledi. Al, kimde-kim bul túnniń qadirinen habary bolmasa, tipti jaman is istese, ol adamdar úshin Qadir túniniń qadiri bolmaıdy. Ol úshin bul qasıetti tún ádettegi tún ispetti ótedi de ketedi. Nendeı jamandyq jasasa, sondaı ǵana jamandyq jazylady.

Aıbek Ábdiqadyr
Muslim.kz saıtynyń dinı sarapshysy