Juma namazy aldynda quran oqýdyń úkimi qandaı?
Ássálamý ýaleıkým! meniń suraǵym mynadaı: Juma kúni ýaǵyzdyń aldynda meshitterde ımamdar Quran oqyp jatady. Sol durys pa?
Ответ
Ýa aleıkým assalam! Qasıetti Quran Kárimde Alla Taǵala:
فَاقْرَءُوا مَا تَيَسَّرَ مِنَ الْقُرْآنِ
«Qurannan jeńil kelgenin oqyńdar», – deıdi[1].
Paıǵambarymyzdyń (s.ǵ.s) Quran súreleriniń artyqshylyǵy jaıynda aıtqan kóp hadısteri bar. Mysalǵa, «Baqara» jáne «Álı Imran» súreleri týraly: «Quran oqyńdar! Rasynda, Qııamet kúni Quran ózin oqýshyǵa shapaǵat etedi. Eki nurdy oqyńdar: «Baqara» jáne «Álı Imran». Rasynda, Qııamet kúni olar eki bult kúıinde keledi... jáne ózin oqýshylardy qorǵaıdy»[2] delinse, «Múlk» súresi týrasynda: «Quranda otyz aıattan turatyn súre bar. Kim ony oqysa, Qııamette onyń kúnási keshirilmeıinshe shapaǵat etýin toqtatpaıdy. Ol – Múlk súresi»[3] – dep aıtylady.
Taǵy bir rıýaıatta:
من قرأ سورة الكهف في يوم الجمعة أضاء له من النور ما بين الجمعتين
«Kim juma kúni «Káhf» súresin oqysa, oǵan eki juma arasynda jaryq etetin nur bolady»[4].
Bul hadıster Qurandy oqýǵa qatysty aıtylǵan edi. Al, endi ony tyńdaý haqysynda ardaqty Paıǵambarymyz (s.ǵ.s.):
مَن اسْتَمَعَ إِلَى آيَةٍ مِن كِتَابِ اللهِ كُتبَت لَهُ حَسَنةٌ مُضَاعَفَةٌ، وَمَن تَلَا آيَةً مِن كِتَابِ اللهِ كَانَت لَهُ نُورًا يَومَ الْقِيامَةِ
«Kimde-kim Allanyń kitaby Qurannan bir aıat tyńdasa, oǵan eselep saýap jazylady. Kimde-kim Qurannan bir aıat oqysa, qııamet kúni ózine nur bolady», – deıdi.
Kelesi bir hadıste:
زينوا القرآن بأصواتكم فإن الصوت الحسن يزيد القرآن حسنًا
«Daýystaryńyzben Qurandy kórkem etińizder, sebebi ádemi daýys Qurannyń ásemdigin arttyra túsedi», – degen[5].
Mine, joǵarydaǵy aıat-hadısterde Qurandy ádemi daýyspen oqýdyń jáne ony tyńdaýdyń, sondaı-aq juma kúni «Káhf» súresin oqýdyń artyqshylyǵy baıandalǵan. Osy oraıda, juma kúni ýaǵyz aldynda Quran oqý jáne ony tyńdaý – jamaǵatty Allanyń kitabyna jınap, namazǵa degen ázirlikti arttyra túsýine óz septigin tıgizetin saýapty is bolyp tabylady.
Nurlan Ramazanov
Respýblıkalyq «Áziret Sultan» meshitiniń naıb ımamy
[1] Mýzammıl 20.
[2] Mýslım.
[3] Ábý Dáýid.
[4] Baıhaqı.
[5] Hakım.
