ТІСІ АЛТЫННЫҢ ІШІ АЛТЫН БОЛА БЕРМЕЙДІ

• Өтіп жатқан жылдар өтпейтін пышаққа ұқсайды. Өтпейтін пышақпен бір нәрсені егей-егей екіге бөлесің. Сол сияқты жылдарда егеліп адам өмірін екіге – жастық пен кәрілікке бөледі. Екіге бөлінген өмір шытынаған шыны сияқты, қайта бірікпейді, ақыры сынып тынады.

• Ғаріп кісі көңілшек келеді.

• Ауруханадағы адамға ауызша сәлем айту, айдалаға айқайлағанмен бірдей.

• Әйелдің әр қозғалысы, әр қимылы жұмбақ. Ол жұмбақты жаңылмай шешіп отыру кез келген еркектің қолынан келмейді.

• Көп адам қылкөпір үстінде кездескендей боп, ауруханада танысады.

• Тісі алтынның іші алтын бола бермейді.

• Жолдас денің сауда жаныңнан табылады, ал ауырсаң алыстап, өлсең ұмытып кетеді.

• Жақсы кітапты оқып шыққанда «Бәләй, қалай тез бітіп қалды?» деп өкінесің. Ал, жаман кітапты тауыса алмай діңкең құриды.

• Басы бұйра жігіт бас киімсіз жүреді.

• Бір тойда екі жар, бір заманда екі пайғамбар болмайды

• Қыз күйеуге кеткенше асығады; барған соң: «Бәләй үйден бекер кеткен екенмін» деп өкінеді.

• Шекесіне мүйіз шыға бастаған кезде бұзау сүзеген келеді.

• Сыйықсыз қыз сәнқой келеді.

• Өлмейтін кітап оқырман көңілңнде қалады, солардың жүрегінде өмір сүріп, солармен қоса қартаяды.

• Бұзақы бойжеткен жолдасының жігітін тартып алады.

• Бұзық еркек біреудің әйелін бұзып алады.

• Қараудың бәрі Қарабай емес.

• Әркім жеткен жеріне барады, жығылған жерінде қалады.

• Кінәмшіл қыз күйеусіз қалады.

• Сараң – алғанына, жомарт бергеніне қуанады.

• Адал әке ақыл айтпай тұра алмайды.

• Әкеге «Бұл менің ұлым!» деп мақтану оңай. Бірақ балаңды: «Бұл менің әкем!» деп мақтандыру қиын.

• Ауру жанға әкімдік қажет емес.

• Шындық үшін адам шоқ та басады, шоқпарға да жығылады.

• Данышпанға ділда байлық емес.

• Жас бала жөргекте тәрбиеленеді.

• Білімсіздігіңді байқату оңай, білгіштігіңді білдірмеу қиын.

• Балаңның тентектігін тыймасаң бұзықтыққа бастағаның.

• Жасында шапалақ жегеннің, өскенде өкініші аз болады.

• Өсек – өткір пышақ.

• Өткір пышақтан өсектің жарасы ауыр.

• Өсектен өрт тұтанады.

• Өсекші үйдің сыртында тұрғанымен, құлағы үйдің ішіндегіні естиді.

• Жаман әдет жұқпалы келеді.

• Нәпсісін тыя білгеннің несібесі толық.

• Өзін –өзі даттаған өзгеден мақтау дәметеді.

• Өзін –өзі мақтаған өзгенің мазағына ұшырайды

• Жақыныңа сүйкімдімін деп ойлау оңай, бірақ сүйіктісі болу қиын

• Адал досын арсыз жамандайды

• Аяқталған іске ақыл сұрамайды

• Арақ арықты да, алыпты да жығады

• Тәтті су шөл қандырмайды

• Керек зат тез жоғалады

• Өзің қырт болсаң – өзгенің соры, қатының қырт болса – өзіңнің сорың

• Ағармайтын шаш, ауырмайтын бас болмайды.

• Еріншектен көңілшек жаман.

• Еріншек жарымайды, көңілшек байымайды

• Жақсыға бөгеу, талантқа тұсау көп

• Тіл ақты қара, көпті дара ете алады.

• Өтірік айтпаса, өсекшінің іші кебеді.

• Өнегені өнеріңмен, үлгіні ісіңмен көрсет.

• Мылжың мақтанына семіреді.

• Ауру әйел айнаға қараса – жазыла бастағанының белгісі.

Әзілхан НҰРШАЙЫҚОВ