«Салауатты өмір салты» эстафеталық сайысы өтті (ФОТО+ВИДЕО)

01 наурыз 2020 6526 0 Оқу режимі

Қазақстан мұсылмандары діни басқармасының Әйелдер-қыздар секторына қарасты «Инабат» қыз-келіншектер клубының ұйымдастыруымен елордалық әйел жамағатына «Салауатты өмір салты» тақырыбында эстафеталық сайыс өтті.

Тартысты сайысқа Елордамыздың 7 мешітінен келген командалар қатысты. Атап айтсақ, «Әзірет Сұлтан» мешітінен «Инабат» тобы, «Нұр Астана» мешітінен «Жібек» тобы, «Сәдуақас қажы Ғылмани» мешітінен «Ридуан» тобы, «Рахымқызы Раиса ана» мешітінен «Фирдаус» тобы, «Ақмешіт» мешітінен «әл-Ихлас» тобы, «Ырыскелді қажы» мешітінен «Шамшырақ» тобы, «Шейх Кунта қажы» мешітінен «Саида» тобы өнер көрсетті.

Қазылар алқасының құрамында ҚМДБ Әйел-қыздар секторының меңгерушісі Ақбөпе Қанатқызы, қол күресінің халықаралық дәрежедегі спорт шебері Қарлығаш Баянбайқызы және №74 мектеп мұғалімі Ақтолқын Ғалымқызы болды. №74 мектептің дене шынықтыру пәні мұғалімі Бимақанова Гүлдана қатысушыларға сайыс ережелерін түсіндіріп, жүргізіп отырды.

Жеті басқыштан тұратын байрақты бәсекеде қатысушылар жылдамдыққа жүгіру, доппен секіру, эстафета таяқшасын алып жүгіру, кедергілер арасымен жүгіру, қаппен секіру, кедергілер арасымен доппен жүгіру, арқан тартыс секілді шарттарды орындады.

Сайыс соңында қатысушылар бағалы сыйлықтармен марапатталды. Бас жүлдені «Рахымқызы Раиса ана» мешітінен келген «Фирдаус» тобы жеңіп алса, «Нұр Астана» мешітінің «Жібек» тобы II орынды иеленді. Ал, «Сәдуақас қажы Ғылмани» мешітінің «Ридуан» тобы III орынды қанжығасына байлады. Қалған қатысушы командалар ынталандыру сыйлықтарымен марапатталды.

Суреттерді «ФОТОГАЛЕРЕЯ» айдарынан көре аласыздар!