Бас мүфти Наурыз мерекесімен құттықтады
Қадірлі бауырлар!
Баршаңызды жыл басы, күллі түркі жұртының дәстүрлі мерекесі – әз-Наурыз мейрамымен шын жүректен құттықтаймын!
Халқымыз «Ұлыс оң болсын, ақ бол молсын!» айтып, бір-біріне ізгі тілегін білдіретін, барша адамзатты бауырмалдық пен татулыққа үндейтін осынау шуақты мерекеде әр отбасыға Алланың амандығы мен берекетін, бақыт пен бірлік, татулық пен бар жақсылықты тілеймін.
Наурыз – бағзы заманнан бері ұлт ретінде ерекше мән беріп келе жатқан ұлттық мерекеміз. Бұл күнде дуалы ауыз ақсақалдар дастархан басында батасын беріп, ренжіскендер кешірім жолын ұстанып, татуласу сынды сауапты һәм салауатты шаралар біріне-бірі ұласып жатады. Алла Тағала қуанышты күндерімізді еселесін!
Біз – тарихымыздың сан қилы сындарлы сәттерінде үмітсіздікке берілмей, бір Алладан медет тілеген халықпыз. Қиындықты сабырға жеңдірген адам Алланың разылығы мен рақымына ие болады.
Елімізде болып жатқан уақытша сынақты әуелі Алланың жәрдемімен, иманымыз бен бірлігіміздің арқасында жеңіп шығатынымызға көбірек үміт артайық.
Құрметті отандастар!
Наурыз мейрамы құтты болсын! Жаратушы Жаббар Иеміз баршаңыздың жанұяңызға жар болғай! Мерекеде айтылған бата-тілек, әрбір жақсы сөзіміз қабыл болсын.
Раббымыз еліміз бен жерімізді түрлі табиғи апат пен індеттен сақтасын. Халқымызға амандық, жұртымызға тыныштық нәсіп еткей.
Деніміз қуатты, әр күніміз шуақты болғай! Әмин!
Наурызбай қажы ТАҒАНҰЛЫ,
Қазақстан мұсылмандары діни басқармасының төрағасы, Бас мүфти
Дереккөз: ҚМДБ баспасөз қызметі
