ҚМДБ төрағасы «Үммет жастарына» айрықша алғыс білдірді (ФОТО)

Қазақстан мұсылмандары діни басқармасының төрағасы Наурызбай қажы Тағанұлы Маңғыстау облысына жасаған ресми сапары барысында мешіт жамағатынан құралған «Үммет жастары» қайырымдылық қорының жұмысымен танысып, нақты тапсырмалар берді.

«Жұмыстарыңызды жақсы білемін. Қайырымдылық бағытында көптеген игі жобаларды жүзеге асырып келесіздер. Өздеріңіз білесіздер, Діни басқарма өз қызметінде негізгі төрт бағытқа басымдық береді. Соның бірі - қайырымдылық. Сіздер осы қайырымдылық бағытындағы бастамаларымызға облыстық деңгейде үлкен үлес қосып келесіздер. Өзімнің және Қазақстан мұсылмандары діни басқармасы ұжымы атынан айрықша алғысымды білдіремін. Алла разы болсын!» - деп игі тілегін жеткізді Бас мүфти Наурызбай қажы Тағанұлы.

Айта кетсек, 2015 жылы құрылған «Үммет жастары» қайырымдылық қоры 4 бағытта қызмет етеді: мұқтаж отбасыларға азық-түлік, киім-кешек тарату, баспанаға аса зәру жандарға көмек көрсету, зейінді және мүмкіндігі шектеулі балаларға жан-жақты қолдау білдіру.

Осыған дейін қор атынан 10 отбасы баспанамен қамтамасыз етіліп, 4 мыңға жуық жанұяға қайырымдылық көмек көрсетілген.

Дереккөз: ҚМДБ баспасөз қызметі