«ӘЗІРЕТ СҰЛТАН» МЕШІТІНДЕ 630 ӘЙЕЛ ШӘКІРТ ЖАҢА ОҚУ МАУСЫМЫН БАСТАДЫ (ФОТО)

14 қаңтар 2025 136 0 Оқу режимі

«Әзірет Сұлтан» мешітінде Астана қаласы өкілдігі «Әйел-қыздар» секторының ұйымдастыруымен Құран әліппесі, араб тілі, ақида, фиқһ пәндері бойынша дәрістерге әйел шәкірттердің жаңа легін қабылдау рәсімі өтті.

Іс-шараға Астана қаласының бас имамы Ерболат Жүсіпов, «Әзірет Сұлтан» мешітінің наиб имамы Жұманазар Садырханов, Астана қаласы «Әйел-қыздар» секторының жетекшісі Күлсара Бекет және басқа да мешіт қызметкерлері мен әйел жамағаты қатысты.

Жиында басында «Әзірет Сұлтан» мешітінің азаншысы, қари Мұсабек Еркінбек Құран аяттарын оқып, көпшілікпен дұға жасалды. Қала бас имамы Ерболат Нұрылдаұлы құттықтау сөз сөйлеп, білім алудың маңыздылығына тоқталды. Діни білімдерді игерудің қоғамдағы рухани тәрбие мен адамгершілік құндылықтарды қалыптастырудағы маңызын атап өтті.

Астана қаласы «Әйел-қыздар» секторының жетекшісі Күлсара Бекет жаңа оқу маусымының бағдарламасымен таныстырып, сабақтар тәжірибелі ұстаздардың жетекшілігімен өтетінін атап өтті. Дәрістер аптаның белгілі күндерінде өткізіліп, әрбір шәкіртке жеке көңіл бөлінетіні айтылды.

Айта кетейік, жаңа оқу маусымында білім алуға ниет білдірген 630 әйел шәкірт тіркелді. Ұстаздар қауымы шәкірттерге сәттілік тілеп, оқу барысында ізденімпаздық пен табандылық танытуға шақырды.

Суреттерді толығырақ «ФОТОГАЛЕРЕЯ» айдарынан көре аласыз!