Maskúnemdi áýlıe etken bir aýyz sóz
Rýhanı din alyptarynyń biri Bıshr Hafı hıjrı 150 (mıladı 757) jyly Merv degen qalada, otyryqshy otbasynda dúnıege kelgen. Baǵdat qalasynda ómir súrip, hıjrı 227 (mıladı 841) jyly ómirden ótti. Óz dáýirinde hadıs ǵalymdarynyń biri bolǵan Bıshr Hafı jas kezinde ishimdikke áýestenip, ýaqytyn bekerge ótkizetin bolǵan eken.
Bir kúni kele jatsa, jerde jatqan bir japyraq qaǵazdy kóredi. Oqyp kórip edi: «Bısmıllahı rahmanı rahım» dep jazylǵan eken. Dereý qaǵazdy tazalap, átir seýip, úıine aparyp taza jerge qoıady.
Sol túni ǵalymdardyń biri tús kóredi. Túsinde ǵaıyptan bir ún: «Bıshrǵa baryp aıt: Bizdiń atymyzdy hosh ıiske bóledi, biz de onyń atyn áıgileımiz, esimimizdi ulyqtady, biz de ony abyroıly etemiz, esimimizdi tazalap kirden aryltty, biz de onyń júregin tazaladyq».
Ǵalym bolsa alǵashynda tańyrqap: «Bul jaı tús qoı», – dep senińkiremeıdi. Sebebi, Bıshr ol kezde jaı júrgen bir araqqumar jigit bolatyn. Osy tús qatarynan úsh márte qaıtalandy. Erteńgisin ǵalym dereý Bıshrdi izdep shyǵady. Bıshrdi mas kúıinde tapqan ol:
– Saǵan bir habarym bar, – dedi. Bıshr:
– Kimnen, qandaı habar? – dep surady.
«Bul habar Alladan keldi» degendi estigende Bıshr: «Meni azaptaımyn deı me?» - dep turǵan boıynda jylady. Sheıh ony jubatyp «Eshqandaı da olaı emes» dedi.
Bıshr: «Onda kúte tur, joldastarymmen birjolata qoshtasaıyn», – dedi. Baryp dostaryna: «Meni shaqyrǵan eken baraıyn ári senderdi de Allaǵa shaqyramyn. Endigári meni áste ishimdik oryndarynan taba almaısyńdar», – dedi. Sodan keıin beıshara kúıde jalań aıaq, jalań bas syrtqa shyǵyp, Rabbysyna uzaq táýbe etti.
Aqıqat jolyn tabandy ustanýynyń arqasynda bara-bara áýlıe kisilerdiń qataryna qosyldy. Osydan soń Bıshr eshqashan aıaq kıim kımedi. Ózin «hafı» ıaǵnı jalań aıaq júrýshi dep atady. Nege aıaq kıim kımeıtini suralǵanda, «Allaǵa táýbege kelgen kúni aıaǵym jalań aıaq bolatyn, endi aıaq kıim kııýge uıalamyn» degen eken.
