«Mısk ata» jaıly hıkaıa

Ertede qulshylyqqa jany qumar, Allanyń nazary túsken bir taqýa kisi ómir súripti. Ózine paıdaly bir jumys istese, qulshylyǵyn eki ese qylyp atqarady eken. Kúnderdiń kúninde álgi kisini kórshi úıde turatyn jalǵyzbasty bir áıel kómekke shaqyrady. Qaısybir jannyń sózin jerge tastamaıtyn jańaǵy aqkóńil jan oıynda eshteńe joq, kómekke shaqyrǵan áıelge jetip barady. Barsa álgi áıeldiń kómekke muqtajdyǵy sezilmeıdi.

Sonda áıel:
– Seni menimen birge bolýǵa shaqyrǵan edim, – deıdi beti búlk etpesten.
– Men Alladan qorqamyn. Men kelise almaımyn, – deıdi kórshisi. Sóıtedi artqa qaraı endi qadymdaı bergeninde áıel:
– Eger de meniń aýlamnan bir qadam attap bassań aıqaılap, meni zorlady dep jala jaýyp, abyroıyńdy túsirem, – deıdi.

Kórshisi amalsyzdan kelisken bolyp, dárethanaǵa baryp kelýge ruqsat alady. Ruqsat alyp dárethanaǵa barady da, ondaǵy bardy ústine jaǵyp áıeldiń qasyna jetip keledi. Kelse jańaǵy áıel jıirkenip: «Ket! Ket ary!» – dep janyna jolatpaıdy. Taqýa janǵa baǵanadan beri keregi de osy edi. Jymıyp qana esikten shyǵyp ketedi. Taqýanyń mundaı kúnáli isten qashyp, tapqan amalyna Alla Taǵala razy bolyp, ony erekshe hosh ıisti adamǵa aınaldyrǵan eken. Sodan ol kisi el arasynda «Mısk ata» dep atalyp ketedi.

Kúlli musylman balasy erekshe áspettep ústine seýip júretin átirdiń «mısk» dep atalýy osy ańyzdan qalsa kerek.

Nurqanat Nurdáýletuly