Jańa Zelandııadaǵy atysta qaza bolǵan Pákistan azamaty erligi úshin marapattaldy

Pákistan bıligi Jańa Zelandııadaǵy meshitte lańkestiń qolynan qarýdy tartyp alýǵa tyrysqan sátinde qaza bolǵan Naım Rashıdti erligi úshin marapattaýǵa sheshim shyǵardy.

Er adam lańkes «An-Nýr» meshitine kirgen kezde onyń qolynan tapanshany tartyp alýǵa tyrysqan. Biraq lańkes ony atyp tastady. Rashıd Pákistan azamaty bolatyn. 

«Pákistan memleketi lańkesti toqtatýǵa tyrysyp jatqan kezinde qaza bolǵan  Mıan Naım Rashıdpen maqtanady, oǵan sol erligi úshin memlekettik marapat beriledi», - dep jazdy Pákistan premer-mınıstri Imran Han Twitter-de. Pákistan syrtqy ister mınıstrliginiń málimetteri boıynsha, Jańa Zelandııadaǵy lańkestik shabýylda toǵyz pákistandyq qaza tapqan. 

«Kraıstcherchtegi terakt barysynda qaıtys bolǵan Pákistan azamattarynyń otbasyna kez kelgen qoldaý kórsetýge daıynbyz», - deıdi premer-mınıstr. 

Aıta keteıik, 15-naýryzda Jańa Zelandııada Kraıstcherchtegi (Ońtústik aral) eki meshitte atys bolyp, sonyń saldarynan 50 adam qaza tapty, taǵy 50 adam túrli jaraqattar alǵan. Eldiń premer-mınıstri bul oqıǵanyń terakt ekenin aıtty. 28 jastaǵy Brenton Tarrant adam óltirgeni úshin aıyptalyp jatyr, senbide sot ony 5-sáýirge deıin abaqtyǵa qamaǵan bolatyn.