Daýylǵa qarsy duǵa bar ma?

Assalaýmaǵaleıkým! Sizderden suraıyn degem, qatty daýyl nemese jelden qorǵaný úshin oqylatyn duǵa bolady ma? 

Ответ

Daýyl, jel – Alla Taǵalanyń jaratqan jaratylystarynyń biri. Ony pendelerdiń paıdasyna boıusyndyryp qoıǵan. Jel keıde meıirimdilik retinde kelse, keıde azap bolyp ta keledi.

Paıǵambarymyz (oǵan Allanyń salaýaty men sálemi bolsyn): «Jel – Alla Taǵalanyń rahmeti, ony (pendelerine) rahym etip jáne azap retinde jiberedi. Eger daýyldy kórseńder, ony sókpeńder. Alladan onyń jaqsylyǵyn surap, jamandyǵynan pana tileńder»[1], - degen.

Imam Shafıǵı: «Jeldi balaǵattaýǵa bolmaıdy. Sebebi, ol Alla Taǵalanyń jaratqany jáne Onyń ámirimen bolady. Sondaı-aq ol Allanyń áskeri, ony qalasa jaqsylyq retinde nemese jamandyq retinde jiberedi»[2],-deıdi.  

Sol úshin musylmandar qatty daýyl soqqanda Allanyń qaharynan qorqyp, azabynan pana tileý qajet. Aısha anamyz (r.a.) bylaı deıdi: «Eger jel turatyn bolsa Paıǵambar (oǵan Allanyń salaýaty men sálemi bolsyn): «Ýa, Alla! Senen jeldiń jaqsylyǵyn, jel alyp keletin jaqsylyqty jáne jeldiń jiberilýindegi jaqsylyqty suraımyn. Ári jeldiń jamandyǵynan, jel alyp keletin jamandyqtan jáne jeldiń jiberilýindegi jamandyqtan pana tileımin», - dep duǵa etýshi edi»[3].

Qoryta aıtqanda, jel – Allanyń jaratqan bir jaratylysy. Onymen rahmet te azap ta keledi. Eger qatty jel nemese daýyl soqqanda ony sókpeı, joǵarydaǵy kelgen duǵany aıqan jón.   

Mahambet Bısenov
Aqtóbe oblysy boıynsha pátýaǵa jaýapty maman

[1] Ábý Dáýit, №5097.
[2] Shafıǵı, «ál-Ýmm», 1/224.
[3] Mýslım, №899.