Áıeldiń namaz oqý úshin eń abzal orny qaı jer?

Sálemetsizder me!  Er kisiniń meshitte bolmasa basqa jerlerde jamaǵatpen oqyǵan namazy 27 ese saýap beriledi, al áıel adamdarda jamaǵat bolady ma? Áıelderde barlyǵy birge namaz oqysa sondaı saýap berile me eken? Aldyn ala rahmet! Gaýhar

Ответ

Ýa aleıkým assalam!

Er kisilerge meshitte jáne basqa oryndarda jamaǵat bolyp namaz oqý – bekitilgen súnnet. Jamaǵat bolyp eseptelý úshin eń kemi ımamdy qosqanda eki kisi bolsa jetkilikti. Hadıste: «Jamaǵat namazy ózderiń jeke oqyǵan namazdan jıyrma bes ese abzal»,[1] – dep aıtylǵan. Al, Ibn Omar (r.a.) rıýaıat etken hadıste: «Jamaǵat namazy jeke namazdan jıyrma jeti ese artyq»,[2] – dep baıan etilgen.

Al, áıelder qaýymy úshin úıde oqyǵan namazy eń abzal bolyp sanalady. Ábý Hamıd ás-Saǵıdıdiń jubaıy kelip: «Ýa, Alla elshisi! Men sizben namaz oqyǵandy jaqsy kóremin», – deıdi. Paıǵambar (s.ǵ.s.): «Menimen namaz oqyǵanda qalaıtynyńdy bilemin, biraq úıde namaz oqyǵanyń bólmede oqyǵanyńnan artyq, bólmede oqyǵanyń aýlańda oqyǵannan artyq, aýlada oqyǵanyń óz qaýymyńnyń meshitinde oqyǵannan artyq, qaýymyńnyń meshitinde namaz oqyǵanyń meniń meshitimde oqyǵannan artyq», – degen eken[3].

Aısha (r.a.) anamyz: «Áıeldiń úıde namaz oqýy aýlada oqyǵannan jaqsyraq, aýlada oqyǵany meshitte oqyǵannan jaqsyraq», [4]– degen hadıs rıýaıat etken.

Hadıste áıelge namaz oqý úshin meılinshe qolaıly jáne yńǵaıly oryn kórsetilgen. Sonymen birge, qyz-kelinshekter bógde adamnyń nazaryna túspeı oqýy saýapty ekeni aıtylýda. Alaıda, bul áıeldiń meshitke barýyna bolmaıdy degen sóz emes. 

Ibn Omar (r.a.) rıýaıat etken hadıste: «Allanyń kúńderin (musylman áıelderdi) Allanyń meshitterinen qaıtarmańdar»,[5] – delingen. Osy hadıs Ábý Dáýid jınaǵynda: «Al, olardyń (áıelderdiń) úıi olar úshin jaqsyraq»,[6] – dep tolyqtyrylǵan.