Paıǵambarymyz (s.ǵ.s.) dindi tolyq jetkizip ketti me?

10 qarasha 2022 808 0
Оqý rejımi

Paıǵambarymyz (s.ǵ.s.) dindi tolyq jetkizip ketti me?


Ответ

Barlyq paıǵambar ataýly mindettelgen jumysy úshin bar ómirin sarp etedi. Olardyń jalǵyz ǵana maqsaty – Alla razylyǵyna ıe bolý. Sol jolda adamdardyń kóńiline jol tabý, eshkimdi Islamnyń aqıqatynan maqurym qaldyrmaý. Ras, bul ekiniń biriniń qolynan kele beretin is emes. Keıbireýler maqsattaryna kirispeı jatyp bosańsyp qalsa, endi biri ortasynda shyǵyp qalyp jatady. Al, paıǵambarlar ózderiniń ómirlik maqsaty dindi táblıǵ etý jolynda júz paıyz jetistikke jetken, nátıjesin de kózi tirisinde kórip ketken.

Paıǵambarlardyń barlyǵy mindetterin minsiz atqardy. Alaıda aqyrǵy elshi Muhammed Mustafanyń (s.ǵ.s.) jaýapkershiligi erekshe, óıtkeni odan keıin paıǵambar kelmek emes. Ol – qııametke deıin kelip-keter adamzattyń barlyǵyna ortaq paıǵambar. Jurttyń kókeıine keler-aý degen barlyq suraqtarǵa jaýaptaryn aıtyp ketti. Alla Taǵalanyń Ózi kámildikke jetkizgen dinniń paıǵambary kishkentaı nárseni bolsa da aıtpaı ketti deý aqylǵa qonymsyz.

Quran kárimde dinniń kemeline jetip, Allanyń adamdarǵa degen osy nyǵmetiniń támamdalǵany: «Búgin dinderińdi kemeldikke jetkizdim. Senderge arnalǵan nyǵmetimdi tamamdadym. Dinderińniń Islam bolýyna razy boldym»[1] dep aıtylǵan. Iaǵnı, senderge ıman, aqıda, ahlaq normalaryn belgiledim jáne eń keremet zań negizderin úırettim. Budan keıin bul dinniń eshqandaı kemshiligi joq. Senderge hıdaıat pen ımanǵa aparatyn tóte joldy kórsettim. Ýaqyt ótken saıyn sandaryń artatyn úlken úmbet qyldym. Musylmandar ózge eshqandaı dindi qajet etpeıtindeı, haramǵa qaıta jolamaıtyndaı dinderiń ıláhı nyǵmet bolyp qııametke deıin qala bermek degendeı.

Eshqandaı da moral negizi qalmaǵan arab jerinde Islam dini kisi aıtsa sengisiz bıikke kóterilip, on jyl ishinde Irak pen Palestınanyń ońtústiginen bastap barlyq arab túbegin qamtıtyn úsh mıllıon sharshy shaqyrymnan asatyn jerge jaıyldy. Paıǵambarymyz (s.ǵ.s.) ómirden ótkennen keıin bes-aq jyldyń ishinde Eýropa men Afrıka, Azııa syndy úsh qurlyqtyń qıyrlaryna deıin barǵan. Eń qyzyǵy sol, qanshama ult pen ulystar sonaý altyn dáýir atalatyn zamanda ózara beıbit ómir súrdi. Paıǵambarymyz (s.ǵ.s.) ózi kóz jumǵanmen sózi áli kúnge deıin úmbetin týra jolda ustap keledi. Qoshtasý qajylyǵynda júz elý myń adam bolǵan desedi. Al qajylyqqa kele almaı elderinde qalyp qoıǵan adamdar qanshama?

Haziret Paıǵambarymyzdyń (s.ǵ.s.) táblıǵynyń aıaqtalǵany onyń ómiriniń sońǵy kezderinde Ráfıqýl-Aǵlany (Uly Dosyn) qalaýy edi. Onsyz da qoshtasý qajylyǵynda «Men óz mindetimdi atqardym ba?» – dep suraǵanda, sahabalary biraýyzdan: «Iá, sen mindetińdi kirshiksiz atqardyń», – dep aǵynan jarylǵany kóp jaıtty sezdirgen bolatyn.

Nurlan Saılaýuly, Ákim Alymýddınuly


[1] «Máıda» súresi, 3.

Автор: Muslim.kz порталы

Pіkіrler Kіrý