Quramynda shoshqa maıy bar dárilerdi paıdalanýǵa bola ma?

Assalamý alaıkým! Quramynda shoshqa maıy bar nemese kúmándi dárilerdi qoldanýǵa bola ma?

Ответ

Ýa aleıkým assalam! Qazir kóp dárilerge dońyzdyń aǵzalarynan alynatyn fermentter qosylady. Onyń basty sebebi, shoshqanyń uıqy bezinen alynatyn pankreatın atty ferment (ydyratýshy katalızator) tamaqtyń tez qortylýyna septigin tıgizedi.

Paıǵambarymyz (Allanyń oǵan salaýaty men sálemi bolsyn): «Emdelińder, rasynda, Alla árbir dertti shıpasymen qosa túsirdi»[1], – dep emdelý kerektigin aıtqan. Kelesi hadıste: «Alla Taǵalanyń haram etken nárselerinde senderge shıpa joq»[2], – dep emniń ózin adal nárselerden izdeýimizdi buıyrdy.

Osyny negizge alyp ǵulamalar sharıǵatta haram nemese nájis dep tanylǵan kez kelgen nárselermen emdelýge ruqsat joq degen. Alaıda dári-dármektiń quramyndaǵy nájis nemese haram nárseler hımııalyq nemese basqa joldarmen óńdelip, ózgertilip basqa zatqa aınalsa nemese joıylyp ketse,  onda ony dári retinde  qoldanýǵa bolady. Al óziniń quramyn túbegeıli ózgertpese, onda ony qoldanýǵa ruqsat joq. Tek zárýlik jaǵdaıda, oǵan balama taza dári tabylmasa ári senimdi, bilikti dáriger usynsa, atalǵan dárini emdik maqsatta qoldanýǵa ruqsat.

Izzýddın ıbn Abdý ás-Sálam óziniń «Qaýaıd ál-ahqam fı masalıh ál-ánam» atty kitabynda joǵarydaǵy kózqarasty qýattap bylaı deıdi:   ﺟﺎﺯاﻟﺘﺪاﻭﻱ ﺑﺎﻟﻨﺠﺎﺳﺎﺕ ﺇﺫا ﻟﻢ ﻳﺠﺪ ﻃﺎﻫﺮا ﻳﻘﻮﻡ ﻣﻘﺎﻣﻬﺎ، ﻷﻥ ﻣﺼﻠﺤﺔ اﻟﻌﺎﻓﻴﺔ ﻭاﻟﺴﻼﻣﺔ ﺃﻛﻤﻞ ﻣﻦ ﻣﺼﻠﺤﺔ اﺟﺘﻨﺎﺏ اﻟﻨﺠﺎﺳﺔ. «Las (nájis) nárseden basqa taza dári tabylmasa, onymen emdelýge ruqsat. Óıtkeni emdelý jáne densaýlyqty saqtaý nájis nárselerden aýlaq bolýdan joǵary turady». 

Anyǵyn Alla bilýshi.

fatua.kz

 

[1] Tırmızı, «Tıb» kitaby, №2038, 4/383.

[2] Býharı rıýaıat etken.

[3] Qaýaıd ál-ahqam fı masalıh ál-anam: 1-tom, 66-bet.