Quranda dınozavrlar týraly aıtylǵan ba?

Assalamýǵaleıkým! Islam ǵalymdary Quranda bári bar deıdi. Eger, din dushpandary jáne dinge senbeıtin fılosoftar: «Senderdiń Qurandaryńda barlyq nárse qamtylǵan bolsa, onda dınozavr týraly aıtylǵan ba?» - dese, qalaı jaýap beremiz. Jaýap bere almaı, Quranda nemese hadısterde bul jaıly aıtylmaǵan desek, Islam ǵalymdary ótirik aıtqan bola ma? Osyndaı suraq qoıǵanyma aıyp etpeńizder. Ár nárseniń naqty jaýabyn «Islamnan» tabatyndyǵyma senemin. Men oılasam, Quran men hadısterde aıtylyp ketken bolýy múmkin ǵoı. Buny tarqatyp, dáleldep aıtyp berseńizder. Qysqasy, dınozavrlar týraly Islam qandaı dáıek aıtady? Beıbarys Sultan

Ответ

Ýaǵaleıkým ássálám! Qurmetti Sultan, Quranda barlyq nárse qamtylǵan bolsa, ol bir tomdyq emes, myń tomdyq kitap bolar edi. Quran - ǵylymı kitap emes. Qurannyń maqsaty – adamdarǵa tabıǵattanýdy, fızıkany, matematıkany, astronomııany t.b. ǵylymdardy tanytý emes. Onyń maqsaty - jaratýshysyn tanytý, ómirde neniń burys, neniń durys ekenin kórsetý, aq pen qarany aıyrý jáne eń bastysy, adamnyń shynaıy bolmysyn oıatý bolyp tabylady.

Árıne, Quranda oqyp-bilýge ıtermeleıtin, ǵylymı zertteýlerdi júrgizýge shaqyratyn aıattar bar. Tipti, keıbir ǵylymı jańalyqtarǵa ıshara etip ketken jerleri de az emes. Degenmen de, Quran, eń áýeli, sanaǵa  - sáýle shashar shyraq, rýhqa shıpa berer daýa, júrekti tazalaıtyn kúsh.  

Al, ǵylymǵa kelgende Quran: «aqyl júgirt» - deıdi. Óıtkeni, Jaratýshymyz adamdy oılansyn, izdensin, ǵylymı jańalyqtar ashsyn, ilim-bilim úırensin dep «aqyl»quralymen jabdyqtaǵan.

Endigi jerde, mynadaı saýal týyndaýy múmkin: Nege Alla Taǵala ǵylymı jańalyqtardy qamtıtyn kitap túsirmedi? Nemese búgingi ashylyp jatqan jańalyqtardy jıyp, terip Quranda aıta salsa bolmas pa edi?

Jaratýshy Iemiz, o basta, Paıǵambarymyzǵa (s.ǵ.s.) Qurandy túsire bastaǵannan-aq uıaly telefon, ınternet, kompıýter týrasynda sóz qozǵaýyna bolar edi. Sebebi, fızıka zańdylyǵyn jaratqan ózi. Biraq, adamnyń aqyly - jetilýdi kerek etedi. Jetilýi úshin ýaqyt lázim. Adamnyń haıýannan aıyryp turatyn taǵy bir ereksheligi de sol, ıaǵnı, adam únemi damý ústinde. Eger, qııametke deıin, shyǵatyn ǵylymı jańalyqtardyń bárin baıandap qoıar bolsa, adamnyń «damý» ereksheligi joǵalar edi. Al, rýhanı qundylyqtar adammen birge dúnıege keletin bolmysyndaǵy bar qasıet. Olar zamanǵa táýeldi emes.

Dınozavrǵa qatysty aıtylǵan Quran Kárim men hadıs sháripterde ashyq málimet joq. Eń durysy - Allaǵa málim!

Abdýsamat Qasym