Famılııany ózgertýge bola ma?
Assalaýmaǵaleıkým, mýsylman baýyrlar. Sizderden bir mańyzdy nárse suraǵym kelgen edi. Negizi, famılııa aýystyrýǵa bola ma? Men burynǵy týǵan ákemniń famılııasyndamyn. Sol famılııany qazirgi ákemniń famılııasyna ózgertsem bola ma? Qazirgi ákem kishkene kezimnen beri tárbıelegen, qıyn kezde dosym bolǵan...
Ответ
Ýa aleıkým assalam. Jalpy, famılııa degen – adamnyń kim ekenin kórsetetin nárse. Ol adamnyń ákesi, ata-babasy, rýy, kerek deseńiz ultynyń kim ekenin baıandaıdy. Sebepsiz famılııasyn ózgertý durys emes. Sebebi, Alla Taǵala Quran Kárimde: «ادْعُوهُمْ لِآبَائِهِمْ» (Olardy ákelerimen shaqyryńdar[1]), – degen. Alaıda, famılııańyzda ákeńizdiń aty bolsa, ony atańyzdyń, arǵy atańyzdyń nemese ákeńizdiń áýelgi aty umytylyp, tanymal bolyp ketken keıingi attaryna aýystyrsańyz bolady. Sebebi siz ákeńizge de, ákeńizdiń ákesine de, arǵy atalaryńyzǵy da birdeı urpaq bolyp sanalasyz. Biraq, bir áýlettiń jemisiń ózgege buryp jiberý zulymdyq bolady.
Sonymen qatar, adamnyń ákesiniń kim ekenine qaraı sharıǵattyń ol adamǵa qatysty úkimi anyqtalady. Sebebi, kimniń-kimge úılene alatyny, kimniń kimge mahram bolatyny, kimniń kimnen mıras alatyny, qaıda jerlenetini syndy t.b. máseleler adamnyń tegimen (famılııasymen) tyǵyz baılanysty.
Al, qazirgi ákeńiz sizdi jaqsylap baǵyp-qaǵyp tárbıelegen bolsa, onyń syıy, aqysy famılııany ózgertýmen bolmaıdy. Onyń ótemi – onyń sizge jasaǵan jaqsylyǵyn múmkindiginshe, kerek bolsa, esesimen qaıtarýyńyzben oryndalady. Ári jetim balany baǵýshy adamǵa aqyrette Alla Taǵala Paıǵambarymyzben (s.ǵ.s) birge kórshi bolý baqytyn syılaǵan.
Toqeteri: famılııańyz ózińizdiń týǵan, bıologııalyq ákeńizben qalsyn, ózgertpeńiz.
Eń durysy Allaǵa málim.
Aıbek Ábdiqadyr
Muslim.kz saıtynyń dinı sarapshysy
