7 sany sáttilik, 13 sany baqytsyzdyq belgisi me?

Assalamý aleıkým! Adamdar arasynda 7 sany sáttilik, al 13 bolsa jamandyq alyp keledi degen túsinik bar. Buǵan qosa,  9, 666 jáne basqa da sandarǵa qatysty yrymdar men joramaldar bar. Osyǵan baılanysty sharıǵı kózqaras qandaı?

Ответ

Ýa aleıkým assalam!

Abdýlla bın Amr (r.a.) rıýaıatynda mynadaı oqıǵa baıan etiledi.  Alla elshisi (s.ǵ.s.): «Kimde-kimdi tyıra (qus ushyrý yrymy) isteıin dep turǵan sharýasynan qaıtarsa, serik qosqan bop tabylady», – deıdi. Sonda adamdar: «Ýa, Alla elshisi! Onyń óteýi ne?» – dep suraǵanda, Paıǵambar (s.ǵ.s.): «Allahýmmá lá hoıra ıllá hoırýk, lá toırá ıllá toırýk ýá lá ıláhá ǵoırýk (Ýa, Alla! Seniń bergen jaqsylyǵyńnan basqa jaqsylyq joq. Qus ekesh qus paıda da, zııan da bermeıdi, tek Sen beresiń. Senen basqa Qudaı joq) dep aıtý», – deıdi[1].

Sondaı-aq, Imran bın Hasyın (r.a.) Alla elshisiniń (s.ǵ.s.): «Qus ushyrǵan jáne qus ushyryp yrymdaǵan bizden emes, bal ashqan jáne bal ashtyrǵan bizden emes, sıqyr jasaǵan jáne sıqyr jasatqan bizden emes»,[2] – degenin rıýaıat etedi.

Imam Naýaı: «Qus ushyrý – yrym. Onyń negizi – sóz, is áreket jáne kórgen isinen jamandyq sezý. Arabtar úrkitip qus ushyryp jáne kıik shaptyratyn, oń tarapqa ushsa – nıet etken saparyna shyǵyp, sharýasyna kirisetin. Al, sol jaqqa ushsa – yrymdap saparǵa shyqpaı, sharýasyn da istemeıtin. Sharıǵat munyń barlyǵyn tyıym salyp, bul yrymnyń eshbir paıdasy da, zııany da joq ekenin baıan etken...», – dep túsindiredi.

Qoryta aıtsaq, belgili bir sandardyń adamǵa sáttilik alyp kelýi nemese jolyn baılap sátsizdikke ushyratýyna senýine bolmaıdy. Bul – kúná. Osyndaıǵa tap bolǵan jaǵdaıda «Allahýmmá lá hoıra ıllá hoırýk, lá toırá ıllá toırýk ýá lá ıláhá ǵoırýk» (Ýa, Alla! Seniń bergen jaqsylyǵyńnan basqa jaqsylyq joq. Qus ekesh qus paıda da, zııan da bermeıdi, tek Sen beresiń. Senen basqa Qudaı joq)», – dep aıtqany jón.

Rýslan Kambarov