Aıaq kıimmen namaz oqýǵa bolady ma?

Assalamý aleıkým! Qys aılarynda keıde juma namazyn meshittiń syrtynda oqýǵa tura keledi. Kún sýyq bolǵandyqtan, aıaq kıimdi sheshpeımiz. Sizderden osy jaıynda suraıyn degen em, sýyq tıgizip almaý úshin aıaq kıimmen namaz oqýǵa bola ma?

Ответ

Ýa aleıkým assalam!

Amr bın Shuǵaıyb ákesinen jáne atasynan rıýaıat etedi: «Men Alla elshisiniń (s.ǵ.s.) jalań aıaq jáne aıaq kıimde namaz oqyǵanyn kórdim».

Al, Ábý Saǵıd ál-Hýdrı (r.a.) mynadaı jaıtty rıýaıat etedi: «Paıǵambar (s.ǵ.s.) aıaq kıimin sheshken soń, adamdar da kebisterin sheshti. Paıǵambar (s.ǵ.s.) namazyn bitirip: «Kebisterińdi nege sheshtińder?» – dep surady. Adamdar: «Sizdiń sheshkenińizdi kórip, biz de sheshtik»[1], – dedi. Paıǵambar (s.ǵ.s.): «Maǵan Jábireıil kelip, aıaq kıimimde bir jaman nárse baryn jetkizdi. Sender meshitke kelseńder, aıaq kıimderińniń tabanyna qarańdar. Jaman nárse (nájis) bolsa jerge ysqylap, onymen (kebisti sheshpeı-aq) namaz oqı berińder»[2].

Túıindeı aıtqanda, sýyq kúnderde aıaq kıimmen namaz oqýǵa ruqsat etiledi. Eń bastysy, aıaq kıimniń tabanynda nájis bolmaýy kerek. Nájis bolǵan kúnniń ózinde qarǵa nemese basqa nársege tazalap alǵan soń oqı berýge bolady.

Rýslan Kambarov

[1] Ahmed, Ábý Dáýid, Ibn Májá
[2] Ahmed, Ábý Dáýid, Baıhaqı