«AQ MESHIT»: ЖАМАҒАТПЕН ЖЫЛДЫ ҚОРЫТЫНДЫЛАУ ШАРАСЫ ӨТТІ (ФОТО)

«Aq meshit» мешітінде жылдағы дәстүр бойынша «Ынтымағы жарасқан жамағат» атты жылды қорытындылау шарасы өтті.

Айта кетсек, Астана мешіттері қайырымдылық, рухани құндылықтарды насихаттау, діни сауат ашу, уағыз-насихат, жастармен жұмыс бағыттарында көптеген шаралар атқарып келеді. «Aq meshit» мешіті де соның бір парасы.

Жиында құлшылық үйінің бас имамы Дәурен Мүслимов жамағатқа мешіт әкімшілігі атынан алғысын білдіріп, әртүрлі іс-шараларға белсенді атсалысқан жандарға алғыс хат табыстады.

Онан соң жамағатқа арнайы дайындалған презентация арқылы бір жыл ішінде атқарылған жұмыстың барысы таныстырылды және де мешіт ұстазы Махмұд Қасым ақ дастархан басында ауызбіршілік пен ынтымақ жайлы жамағатқа уағыз айтты.

«Ауызбіршілікте – Алланың мейірімі, бөлінуде – қаһары бар», «Мұсылман мұсылман үшін бір-бірін бекем ұстап тұрған ғимарат тәрізді», - деп хадистерде айтылғандай жамағаттың ауызбіршілігі мен ынтымағының арқасында елорда мешіттері көптеген игі істерге мұрындық болып келеді.