«ӘЗІРЕТ СҰЛТАН» МЕШІТІНДЕ ҚҰРАНҒА ТҮСКЕН ӘЙЕЛ ШӘКІРТТЕРДІ МАРАПАТТАУ КЕШІ ӨТТІ (ФОТО)
«Әзірет Сұлтан» мешітінде әйел шәкірттердің Құранды жаттау жолындағы табыстарына орай марапаттау рәсімі өтті. Шараға Астана қаласының және «Әзірет Сұлтан» мешітінің бас имамы Ерболат Жүсіпов және мешіттің әйел ұстаздары мен шәкірттер қауымы қатысты.
Жиын қасиетті Құран аяттарымен басталып, қала бас имамы Ерболат Нұрылдаұлы шәкірттердің рухани ізденіс жолындағы табандылығы мен ынтасын ерекше атап өтіп, алдағы ізденістеріне сәттілік тіледі.
Шара барысында шәкірттерге арнайы сертификаттар мен Құран кітаптары тарту етілді. Құранға деген маххаббаты мен талабының арқасында Алланың кітабын түпнұсқада оқу мүмкіндігіне қол жеткізген ақ жаулықты әжелер қауымы да ұстаздарға өз алғыстары мен ризашылықтарын білдіріп жатты.
Бұл жиын Құран жаттаудың қадірін насихаттап, рухани тәрбиеге ұмтылған жандар үшін үлкен демеу. Мешіт ұжымы осындай игі шаралардың алдағы жыл бойы жалғасын табатынын жеткізді.
Суреттерді толығырақ «ФОТОГАЛЕРЕЯ» айдарынан көре аласыз!
Дереккөз: ҚМДБ Астана қаласы өкілдігінің баспасөз қызметі
